മാഡ്രിഡ്: സ്‌പാനിഷ്‌ ലാലിഗയില്‍ അത്‌ലറ്റിക്കോ മാഡ്രിഡിനെതിരായ മത്സരം ബാഴ്‌സക്ക് കടുപ്പമേറിയതായിരുന്നു. സൂപ്പര്‍ താരം റോബർട്ട് ലെവൻഡോവ്‌സ്‌കി ഇല്ലാതെയിറങ്ങിയ ബാഴ്‌സ ഏകപക്ഷീയമായ ഒരു ഗോളിന് മത്സരം വിജയിച്ചിരുന്നു. അത്‌ലറ്റിക്കോയുടെ തട്ടകമായ മെട്രോപൊളിറ്റാനോ സ്റ്റേഡിയത്തില്‍ ഒസ്‌മാൻ ഡെംബെലെയാണ് ബാഴ്സയുടെ വിജയ ഗോള്‍ നേടിയത്.
എന്നാല്‍ കളിക്കിടെ മൈതാനത്തുണ്ടായ ആവേശകരമായ ഒരു ഗുസ്‌തി മത്സരത്തിന്‍റെ ദൃശ്യം സോഷ്യല്‍ മീഡിയയില്‍ വൈറലാവുകയാണ്. മത്സരത്തിന്‍റെ അധിക സമയത്ത് ബാഴ്സയുടെ ഫെറാന്‍ ടോറസും അത്‌ലറ്റിക്കോ ഡിഫന്‍ഡര്‍ സ്റ്റെഫാൻ സാവിച്ചും തമ്മിലായിരുന്നു പെനാല്‍റ്റി ബോക്സിനരികെ കയ്യാങ്കളി നടന്നത്. വാശിയേറിയ പോരാട്ടം കണ്ടു നിന്ന റഫറി ഇരുവര്‍ക്കും ചുവപ്പ് നല്‍കുകയും ചെയ്‌തു.
ഇരുവരും പുറത്തായതോടെ 10 പേരുമായാണ് രണ്ട് ടീമുകളും മത്സരം പൂര്‍ത്തിയാക്കിയത്. മത്സരത്തിന്‍റെ 22ാം മിനിട്ടിലാണ് ഡെംബെലെ ബാഴ്സയുടെ വിജയ ഗോള്‍ കണ്ടെത്തിയത്. പെഡ്രിയുടെ ഒരു തകര്‍പ്പന്‍ നീക്കത്തില്‍ നിന്നാണ് ഗോളിന്‍റെ വരവ്.