ലണ്ടന്‍ : ഇംഗ്ലീഷ് പ്രീമിയര്‍ ലീഗില്‍ മാഞ്ചസ്റ്റര്‍ യുണൈറ്റഡിന്‍റെ വിജയക്കുതിപ്പിന് സമനില കുരുക്കിട്ട് ക്രിസ്റ്റല്‍ പാലസ്. സെല്‍ഹര്‍സ്റ്റ് പാര്‍ക് സ്റ്റേഡിയത്തില്‍ നടന്ന പത്തൊന്‍പതാം റൗണ്ട് മത്സരത്തില്‍ ഓരോ ഗോളടിച്ചാണ് ഇരു ടീമുകളും പിരിഞ്ഞത്. യുണൈറ്റഡിനായി ബ്രൂണോ ഫെര്‍ണാണ്ടസ് ഗോളടിച്ചപ്പോള്‍ മൈക്കിള്‍ ഒലൈസിന്‍റെ ഗോളിലൂടെയാണ് ക്രിസ്റ്റല്‍ പാലസ് തിരിച്ചടിച്ചത്.
സമനിലയോടെ യുണൈറ്റഡിന് 19 മത്സരങ്ങളില്‍ 39 പോയിന്‍റായി. 18 മത്സരങ്ങളില്‍ 39 പോയിന്‍റുള്ള മാഞ്ചസ്റ്റര്‍ സിറ്റിയാണ് പട്ടികയില്‍ രണ്ടാമത്. ഞായറാഴ്‌ച,ടേബിള്‍ ടോപ്പേഴ്‌സ് ആയ ആര്‍സണലിനെതിരെയാണ് യുണൈറ്റഡിന്‍റെ അടുത്ത മത്സരം.
സെല്‍ഹര്‍സ്റ്റിലെ 80 മിനിട്ട് വരെ മത്സരം യുണൈറ്റഡിന്‍റെ കാലുകളിലായിരുന്നു. അവിടുന്നങ്ങോട്ടാണ് ചുവന്ന ചെകുത്താന്‍മാര്‍ക്ക് തിരിച്ചടികള്‍ നേരിട്ടത്. മത്സരത്തിന്‍റെ 81-ാം മിനിട്ടില്‍ മിഡ്‌ഫീല്‍ഡ് ജനറല്‍ കാസിമിറോയ്‌ക്ക് മഞ്ഞക്കാര്‍ഡ് ലഭിച്ചു.
ക്രിസ്റ്റല്‍ പാലസിന്‍റെ സാഹയെ വലിച്ചിട്ടതിനാണ് താരത്തിന് മഞ്ഞക്കാര്‍ഡ് കിട്ടിയത്. സീസണില്‍ കാസിമിറോയുടെ അഞ്ചാമത്തെ മഞ്ഞക്കാര്‍ഡാണിത്. ഇതോടെ ഞായറാഴ്‌ച എമിറേറ്റ്സ് സ്റ്റേഡിയത്തില്‍ ആര്‍സണലിനെതിരായി നടക്കുന്ന മത്സരത്തില്‍ താരത്തിന് ഇറങ്ങാന്‍ സാധിക്കില്ല.
ക്രിസ്റ്റല്‍ പാലസിനെതിരായ മത്സരത്തില്‍ ജയം നേടിയാല്‍ മാഞ്ചസ്റ്റര്‍ സിറ്റിയെ പിന്നിലാക്കി പോയിന്‍റ് പട്ടികയിലേക്ക് കുതിക്കാന്‍ യുണൈറ്റഡിന് സാധിക്കുമായിരുന്നു. മൂന്ന് പോയിന്‍റുമായി സെല്‍ഹര്‍സ്റ്റില്‍ നിന്നും മടങ്ങാമെന്നായിരുന്നു ടീമിന്‍റെ പ്രതീക്ഷ. എന്നാല്‍ ഇഞ്ചുറി ടൈമില്‍ ഒലൈസ് ഫ്രീ കിക്ക് കൃത്യമായി വലയിലെത്തിച്ച് യുണൈറ്റഡിന്‍റെ മോഹങ്ങള്‍ക്ക് മങ്ങലേല്‍പ്പിച്ചു.
ഫന്‍റാസ്റ്റിക് ബ്രൂണോ :തുടര്‍ച്ചയായ ആറാം ജയം ലക്ഷ്യമിട്ടാണ് ക്രിസ്റ്റല്‍ പാലസിനെതിരെ പന്ത് തട്ടാന്‍ എറിക് ടെന്‍ ഹാഗിന്‍റെ ശിഷ്യന്മാര്‍ സെല്‍ഹര്‍സ്റ്റില്‍ ഇറങ്ങിയത്. മത്സരത്തിന്‍റെ തുടക്കത്തില്‍ തന്നെ പന്തിന്‍റെ നിയന്ത്രണം ഏറ്റെടുത്ത യുണൈറ്റഡ് താരങ്ങള്‍ അനായാസം എതിര്‍ പകുതിയിലേക്ക് മുന്നേറ്റങ്ങള്‍ നടത്തിക്കൊണ്ടേയിരുന്നു. മൈതാനത്തിന്‍റെ വലതുവശം കേന്ദ്രീകരിച്ചായിരുന്നു ആദ്യ 20 മിനിട്ടില്‍ യുണൈറ്റഡിന്‍റെ ഭൂരിഭാഗം മുന്നേറ്റങ്ങളും.