ടോക്കിയോ :ലോക ബാഡ്‌മിന്‍റണ്‍ ചാമ്പ്യൻഷിപ്പിൽ ലോക രണ്ടാം നമ്പർ താരത്തിനെതിരെ അട്ടിമറി വിജയവുമായി പ്രീക്വാര്‍ട്ടറിൽ പ്രവേശിച്ച് എച്ച് എസ് പ്രണോയ്. പുരുഷ സിംഗിള്‍സ് വിഭാഗത്തിലെ രണ്ടാം റൗണ്ട് മത്സരത്തിൽ ജപ്പാന്‍റെ ലോക രണ്ടാം നമ്പർ താരം കെന്‍റോ മൊമോട്ടയെ നേരിട്ടുള്ള സെറ്റുകൾക്കാണ് പ്രണോയ് തകർത്തത്. സ്‌കോർ 21-17, 21-16.
രണ്ട് തവണ ലോകചാമ്പ്യനായിട്ടുള്ള മൊമോട്ടയെ നിഷ്‌പ്രഭമാക്കുന്ന തരത്തിലുള്ള പ്രകടനമാണ് പ്രണോയ് മത്സരത്തിലുടനീളം പുറത്തെടുത്തത്. മൊമോട്ടയ്‌ക്കെതിരെ 9 മത്സരങ്ങൾ ഏറ്റുമുട്ടിയിട്ടുള്ള പ്രണോയിയുടെ ആദ്യ വിജയം കൂടിയാണിത്. പ്രീ ക്വാർട്ടറിൽ ലക്ഷ്യ സെന്നാണ് പ്രണോയിയുടെ എതിരാളി.