വീണ്ടും പരിക്കിന്‍റെ കളി; ബ്രസീല്‍ നിരയില്‍ ഗബ്രിയേൽ ജീസസും അലക്‌സ് ടെല്ലസും ലോകകപ്പില്‍ നിന്ന് പുറത്ത്

കാമറൂണിനെതിരായ അവസാന മത്സരത്തിൽ കാൽമുട്ടിനേറ്റ പരിക്കിനെ തുടർന്നാണ് ബ്രസീലിയൻ താരങ്ങൾക്ക് ശേഷിക്കുന്ന മത്സരങ്ങൾ നഷ്‌ടമാകുക. ഫുൾബാക്കിൽ കളിക്കുന്ന അലക്‌സ് സാൻഡ്രോ, ഡാനിലോ എന്നിവരും പരിക്കിന്‍റെ പിടിയിലാണ്.

ദോഹ: ദക്ഷിണ കൊറിയക്കെതിരായ പ്രീ ക്വാർട്ടർ മത്സരത്തിനൊരുങ്ങുന്ന ബ്രസീൽ ടീമിന് തിരിച്ചടി. പരിക്കേറ്റ് വിശ്രമത്തിലുള്ള നെയ്‌മർ ജൂനിയറിന് പുറമെ ഗബ്രിയേൽ ജീസസും അലക്‌സ് ടെല്ലസുമാണ് പരിക്കേറ്റ് പുറത്തായത്. ഗ്രൂപ്പിലെ കാമറൂണിനെതിരായ അവസാന മത്സരത്തിൽ കാൽമുട്ടിനേറ്റ പരിക്കാണ് ഇരുവർക്കും വിനയായത്.

കാമറൂണിനെതിരെ ഏകപക്ഷീയമായ ഒരു ഗോളിന് പരാജയപ്പെട്ട മത്സരത്തിന്‍റെ രണ്ടാം പകുതിയുടെ തുടക്കത്തിലാണ് അലക്‌സ് കളം വിട്ടത്. തൊട്ടുപിന്നാലെ ജീസസിനെയും കോച്ച് ടിറ്റെ പിൻവലിച്ചു. ഫുൾബാക്കിൽ കളിക്കുന്ന അലക്‌സ് സാൻഡ്രോയും ഡാനിലോയും പരിക്കിന്‍റെ പിടിയിലാണ്.

പ്രീക്വാർട്ടർ ഉറപ്പിച്ചതോടെ കാമറൂണിനെതിരെയുള്ള ഇലവനിൽ ഒമ്പത് മാറ്റങ്ങളാണ് കോച്ച് ടിറ്റെ കൊണ്ടുവന്നിരുന്നത്. എന്നാൽ ലോകകപ്പ് ചരിത്രത്തിൽ ആദ്യമായി ആഫ്രിക്കൻ ടീമിനോട് പരാജയപ്പെടുന്നതിനാണ് ഇത് വഴിയൊരുക്കിയത്.

സെർബിയക്കെതിരായ മത്സരത്തിൽ പരിക്കുമായി കളംവിട്ട നെയ്‌മർ ബ്രസീലിന്‍റെ അടുത്ത മത്സരങ്ങളിൽ കളത്തിലിറങ്ങിയേക്കുമെന്നാണ് കോച്ച് ടിറ്റെയുടെ വാക്കുകൾ സൂചിപ്പിക്കുന്നത്. കാമറൂണിനെതിരായ മത്സരത്തിന് ശേഷം സഹതാരങ്ങൾക്കൊപ്പം മൈതാനത്തെത്തിയതോടെ നെയ്‌മർ ദക്ഷിണ കൊറിയയ്‌ക്കെതിരെ കളിക്കുമെന്ന പ്രതീക്ഷയിലാണ് ആരാധകർ.