മെല്‍ബണ്‍ : ഓസ്‌ട്രേലിയൻ ഓപ്പൺ ടെന്നിസ് ടൂര്‍ണമെന്‍റ് ഏതൊരു കളിക്കാരനേക്കാളും വളരെ പ്രധാനമാണെന്ന് റാഫേൽ നദാൽ. നൊവാക് ജോക്കോവിച്ചുണ്ടായാലും ഇല്ലെങ്കിലും ഓസ്‌ട്രേലിയൻ ഓപ്പൺ മികച്ചതായിരിക്കുമെന്ന് റാഫേൽ നദാൽ പറഞ്ഞു. ടൂര്‍ണമെന്‍റിന് മുന്നോടിയായുള്ള വാര്‍ത്താസമ്മേളനത്തിലാണ് നദാല്‍ ഇക്കാര്യം പറഞ്ഞത്.
"ഞാൻ നിങ്ങളോട് ഒരു കാര്യം പറയുന്നു, ചരിത്രത്തിലെ ഏറ്റവും മികച്ച കളിക്കാരിൽ ഒരാളാണ് നൊവാക് ജോക്കോവിച്ച് എന്നത് വളരെ വ്യക്തമാണ്, ഒരു സംശയവുമില്ലാതെ. എന്നാൽ ചരിത്രത്തിൽ ഒരു ഇവന്‍റിനേക്കാള്‍ പ്രാധാന്യമുള്ള ഒരു കളിക്കാരനില്ല" നദാൽ പറഞ്ഞു.
വാക്‌സിനെടുക്കാത്തുമായി ബന്ധപ്പെട്ട പ്രശ്‌നങ്ങളെ തുടര്‍ന്ന് സെര്‍ബിയയുടെ ലോക ഒന്നാം നമ്പര്‍ ടെന്നിസ് താരമായ ജോക്കോയുടെ വിസ രണ്ടാമതും റദ്ദാക്കിയ സാഹചര്യത്തിലാണ് നദാലിന്‍റെ പ്രതികരണം. ജോക്കോയുടെ വിസയുമായുള്ള പ്രശ്‌നങ്ങള്‍ നിലനില്‍ക്കുന്നുണ്ടെങ്കിലും ടൂര്‍ണമെന്‍റിന്‍റെ നറുക്കെടുപ്പില്‍ ടെന്നിസ് ഓസ്‌ട്രേലിയ ജോക്കോയേയും ഉള്‍പ്പെടുത്തിയിരുന്നു.