ടൂറിന്‍: എടിപി ഫൈനൽസ് ടെന്നീസ് കിരീടം സെര്‍ബിയയുടെ ലോക എട്ടാം നമ്പര്‍ താരം നൊവാക് ജോക്കോവിച്ചിന്. കലാശപ്പോരില്‍ ലോക മൂന്നാം നമ്പർ താരം കാസ്‌പർ റൂഡിനെ തോല്‍പ്പിച്ചാണ് 35കാരനായ ജോക്കോ കിരീടം ഉയര്‍ത്തിയത്. ഏകപക്ഷീയമായ രണ്ട് സെറ്റുകള്‍ക്കാണ് 23കാരനായ കാസ്‌പർ റൂഡ് ജോക്കോയ്‌ക്ക് മുന്നില്‍ കീഴടങ്ങിയത്.
രണ്ട് മണിക്കൂറില്‍ താഴെ മാത്രമാണ് മത്സരം നീണ്ടുനിന്നത്. സ്‌കോര്‍: 7-5, 6-3. സീസണ്‍ എന്‍ഡിങ് ടൂര്‍ണമെന്‍റായ എടിപി ഫൈനൽസില്‍ ആറാം കിരീടമാണ് ജോക്കോ ഇത്തവണ നേടിയത്. ഇതോടെ എടിപി ഫൈനല്‍സില്‍ ഏറ്റവുമധികം കിരീടങ്ങളെന്ന റോജര്‍ ഫെഡററുടെ റെക്കോഡിനൊപ്പമെത്താനും ജോക്കോയ്‌ക്ക് കഴിഞ്ഞു.