വാഷിങ്‌ടണ്‍: യുക്രൈൻ അധിനിവേശം തുടരുന്ന റഷ്യക്കെതിരെ കടുത്ത ഉപരോധങ്ങളാണ് കായിക മേഖലയിൽ നിന്ന് ഉയർന്നുവരുന്നത്. ഏറെക്കുറെ എല്ലാ കായിക മത്സരങ്ങളിൽ നിന്നും റഷ്യയേയും റഷ്യൻ താരങ്ങളെയും വിലക്കി. ചില ഇനങ്ങളിൽ റഷ്യൻ താരങ്ങൾക്ക് പങ്കെടുക്കാൻ അനുവാദമുണ്ടെങ്കിലും റഷ്യൻ പതാകയ്‌ക്ക് കീഴിലാവരുതെന്ന് കർശന നിർദേശവും നൽകിയിട്ടുണ്ട്. ഇതോടെ കായിക ലോകത്തെ വൻ ശക്‌തികൾ എന്ന റഷ്യയുടെ പ്രതിച്ഛായ തകരും എന്നാണ് കണക്കുകൂട്ടൽ. റഷ്യക്കെതിരെ ഉപരോധം ഏർപ്പെടുത്തിയ കായിക മേഖലകൾ ചുവടെ.
- ആർച്ചറി
റഷ്യയുടേയും, ബെലാറസിന്‍റെയും ദേശീയ പതാകകളും, ദേശീയ ഗാനങ്ങളും വേൾഡ് ആർച്ചറി ഈവന്‍റ്സുകളിൽ നിരോധിച്ചു
- അത്‌ലറ്റിക്‌സ്
ഈ ആഴ്‌ച ഒമാനിൽ നടക്കുന്ന വേൾഡ് റേസ് വാക്കിങ് ടീം ചാമ്പ്യൻഷിപ്പുകൾ, ഈ മാസം സെർബിയയിൽ നടക്കുന്ന ലോക ഇൻഡോർ ചാമ്പ്യൻഷിപ്പുകൾ, ജൂലൈയിൽ ഒറിഗോണിലെ യൂജിനിൽ നടക്കുന്ന ലോക ചാമ്പ്യൻഷിപ്പുകൾ എന്നിവ ഉൾപ്പെടെ എല്ലാ ലോക അത്‌ലറ്റിക്‌സ് സീരീസ് ഇനങ്ങളിൽ നിന്നും റഷ്യ, ബെലാറസ് അത്ലറ്റുകൾക്കും ഒഫീഷ്യലുകൾക്കും വിലക്ക്
- ഓട്ടോ റേസിങ്
സെപ്റ്റംബറിൽ ആരംഭിക്കാനിരുന്ന റഷ്യൻ ഗ്രാൻഡ്പ്രീ റദ്ദാക്കി ഫോർമുല വണ്‍. എന്നാൽ റഷ്യൻ താരങ്ങൾക്ക് റഷ്യൻ പതാകക്ക് കീഴിലല്ലാതെ കാറോട്ട മത്സരങ്ങളിൽ പങ്കെടുക്കാമെന്ന് ഓട്ടോ റേസിങ്ങിന്‍റെ അന്താരാഷ്ട്ര സംഘടനയായ എഫ്ഐഎ അറിയിച്ചു. ജൂണിൽ സോചിയിൽ നടത്താൻ നിശ്ചയിച്ചിരുന്ന ഇന്‍റർ കോണ്ടിനെന്‍റൽ ഡ്രിഫ്‌റ്റിങ് കപ്പും റദ്ദാക്കിയിട്ടുണ്ട്.
- ബാഡ്‌മിന്‍റണ്‍
മാർച്ച് 8 മുതൽ ബാഡ്‌മിന്‍റൺ വേൾഡ് ഫെഡറേഷന്‍റെ എല്ലാ ടൂർണമെന്‍റുകളിലും പങ്കെടുക്കുന്നതിൽ നിന്ന് റഷ്യ, ബെലാറസ് അത്ലറ്റുകൾക്കും ഒഫീഷ്യലുകൾക്കും വിലക്കേർപ്പെടുത്തി. കൂടാതെ, റഷ്യയിലെയും ബെലാറസിലെയും എല്ലാ പരിപാടികളും ഫെഡറേഷൻ റദ്ദാക്കി. എന്നാൽ ഈ ആഴ്‌ചയും അടുത്ത ആഴ്‌ചയും സ്‌പെയിനിൽ നടക്കുന്ന രണ്ട് പാരാ ഇവന്‍റുകളിൽ റഷ്യൻ പതാകക്ക് കീഴിലല്ലാതെ റഷ്യൻ താരങ്ങൾക്ക് കളിക്കാൻ അനുമതി നൽകിയിട്ടുണ്ട്.
- ബാസ്‌കറ്റ് ബോൾ
റഷ്യ ടീമുകളെയും ഉദ്യോഗസ്ഥരെയും എല്ലാ മത്സരങ്ങളിൽ നിന്നും അന്താരാഷ്ട്ര ബാസ്‌കറ്റ്ബോൾ ഫെഡറേഷൻ സസ്പെൻഡ് ചെയ്തു. റഷ്യൻ ക്ലബ്ബുകളായ സിഎസ്‌കെഎ മോസ്കോ, യുനിക്‌സ് കസാൻ, സെന്‍റ് പീറ്റേഴ്‌ബർഗ് എന്നിവയെ യൂറോ ലീഗ് സസ്പെൻഡ് ചെയ്തു. റഷ്യൻ ക്ലബായ ലോക്കോമോട്ടീവ് കുബൻ ക്രാസ്‌നോദറിനെ യൂറോ കപ്പിൽ നിന്ന് സസ്പെൻഡ് ചെയ്തു.
- കനോയിങ്
റഷ്യയിലെയും ബെലാറസിലെയും അത്‌ലറ്റുകളെ അന്താരാഷ്ട്ര കനോ ഫെഡറേഷൻ ഇവന്‍റുകളിൽ മത്സരിക്കുന്നതിൽ നിന്ന് വിലക്കി. റഷ്യയിൽ നിന്നുള്ള ഉദ്യോഗസ്ഥരെ ഐസിഎഫ് അനുവദിച്ച ഏതെങ്കിലും പരിപാടിയിൽ പങ്കെടുക്കുന്നതിൽ നിന്നും വിലക്കിയിട്ടുണ്ട്.
- സ്പോർട്ട് ക്ലൈംബിങ്
ഏപ്രിലിൽ മോസ്കോയിൽ നടക്കാനിരുന്ന ബോൾഡർ ആൻഡ് സ്‌പീഡ് ലോകകപ്പ് മാറ്റി വയ്ക്കും.
- കേളിങ്
നവംബറിൽ റഷ്യയിലെ പെർമിൽ നടക്കാനിരിക്കുന്ന യൂറോപ്യൻ ചാമ്പ്യൻഷിപ്പുകൾ മാറ്റി വയ്ക്കും. ഈ മാസം കാനഡയിൽ നടക്കുന്ന വനിതാ ലോക ചാമ്പ്യൻഷിപ്പിൽ നിന്നും ഏപ്രിലിൽ ലാസ് വെഗാസിൽ നടക്കുന്ന പുരുഷ ലോക ചാമ്പ്യൻഷിപ്പിൽ നിന്നും റഷ്യൻ എൻട്രികൾ നീക്കം ചെയ്യുന്നതിനുള്ള നടപടികൾ വേൾഡ് കേളിങ് ഫെഡറേഷൻ ആരംഭിച്ചു.
- സൈക്ലിങ്
റഷ്യൻ, ബെലാറഷ്യൻ റൈഡർമാരെ നിഷ്‌പക്ഷരായി മത്സരിക്കാൻ അനുവദിക്കുമെങ്കിലും റഷ്യൻ, ബെലാറഷ്യൻ ടീമുകളെയും സ്പോൺസർമാരെയും വിലക്കുമെന്ന് ഇന്‍റർനാഷണൽ സൈക്ലിങ് യൂണിയൻ.
- ഇക്വസ്ട്രിയൻ
ജൂലൈയിൽ മോസ്കോയിൽ നടക്കുന്ന യുറേഷ്യൻ ചാമ്പ്യൻഷിപ്പുകൾ ഉൾപ്പെടെ ഈ വർഷം റഷ്യയിലും, ബെലാറസിലും ശേഷിക്കുന്ന എല്ലാ മത്സരങ്ങളും ഇന്‍റർനാഷണൽ ഇക്വസ്ട്രിയൻ ഫെഡറേഷൻ റദ്ദാക്കി.
- ഫെൻസിങ്
റഷ്യക്കാരനായ അലിഷർ ഉസ്‌മാനോവിനെ ഇന്‍റർനാഷണൽ ഫെൻസിങ് ഫെഡറേഷന്‍റെ പ്രസിഡന്‍റ് സ്ഥാനത്തുനിന്ന് മാറി.
- ജിംനാസ്റ്റിക്‌സ്
റഷ്യയിലും ബെലാറസിലും നടക്കുന്ന എല്ലാ ലോകകപ്പ്, വേൾഡ് ചലഞ്ച് കപ്പ് മത്സരങ്ങളും ഇന്‍റർനാഷണൽ ജിംനാസ്റ്റിക് ഫെഡറേഷൻ റദ്ദാക്കി. എല്ലാ ഇവന്‍റുകളിലും റഷ്യയുടെയും ബെലാറസിന്‍റെയും പതാകകളും ഗാനങ്ങളും നിരോധിച്ചു. മെയ് മാസത്തിൽ റഷ്യയിൽ നടക്കുന്ന അക്രോബാറ്റിക്‌സ് ലോകകപ്പും സെപ്റ്റംബറിൽ സെന്‍റ് പീറ്റേഴ്‌സ്ബർഗിൽ നടക്കുന്ന ട്രാംപോളിൻ ലോകകപ്പും റദ്ദാക്കിയ ഇവന്‍റുകളിൽ ഉൾപ്പെടുന്നു.
- ഫീൽഡ് ഹോക്കി
ഏപ്രിലിൽ ദക്ഷിണാഫ്രിക്കയിൽ നടന്ന വനിതാ ജൂനിയർ ലോകകപ്പിൽ നിന്ന് റഷ്യയെ ഒഴിവാക്കി
- ഐസ് ഹോക്കി
എല്ലാ അന്താരാഷ്ട്ര ഐസ് ഹോക്കി ഫെഡറേഷൻ ഇവന്‍റുകളിൽ നിന്നും റഷ്യയെയും ബെലാറസിനെയും വിലക്കി. മേയിൽ നടക്കുന്ന പുരുഷ ലോക ചാമ്പ്യൻഷിപ്പിൽ നിന്ന് റഷ്യ പുറത്തായി. 2023-ൽ റഷ്യയിൽ നടന്ന ലോക ജൂനിയർ ചാമ്പ്യൻഷിപ്പുകൾ സെർബിയയിലേക്ക് മാറ്റി. നാഷണൽ ഹോക്കി ലീഗ് റഷ്യയിലെ എല്ലാ ബിസിനസ് ഇടപാടുകളും നിർത്തിവച്ചു. കോണ്ടിനെന്‍റൽ ഹോക്കി ലീഗ് കോൺഫറൻസ് ക്വാർട്ടർ ഫൈനലിൽ നിന്ന് ഫിൻലൻഡിലെ ജോക്കറിറ്റ് ക്ലബ് പിന്മാറി.
- ജൂഡോ
മെയ് മാസത്തിൽ നടക്കുന്ന ലോക ജൂഡോ ടൂർ ഇവന്‍റായ കസാൻ ഗ്രാൻഡ് സ്ലാം റദ്ദാക്കി. അന്താരാഷ്ട്ര ജൂഡോ ഫെഡറേഷന്‍റെ ഓണററി പ്രസിഡന്‍റും അംബാസഡറുമായ റഷ്യ പ്രസിഡന്‍റ് വ്‌ളാഡിമിർ പുടിനെ സസ്പെൻഡ് ചെയ്തു. യൂറോപ്യൻ ജൂഡോ യൂണിയന്‍റെ റഷ്യൻ പ്രസിഡന്‍റ് സെർജി സോളോവെയ്‌ചിക് രാജിവച്ചു.
- കരാട്ടെ
ഒക്ടോബറിൽ മോസ്കോയിൽ നടക്കാനിരുന്ന കരാട്ടെ 1-പ്രീമിയർ ലീഗ് ഇവന്‍റ് മറ്റൊരു രാജ്യത്തേക്ക് മാറ്റും.
- മോഡേണ്‍ പെന്‍റാത്തലൺ