ലണ്ടന്‍ : ബ്രസീലിയന്‍ മിഡ്ഫീല്‍ഡര്‍ വില്ലിയൻ ബോർജസ് പ്രീമിയര്‍ ലീഗ് ക്ലബ് ആഴ്‌സണല്‍ വിട്ടു. രണ്ട് വര്‍ഷക്കാല കരാര്‍ ബാക്കിയിരിക്കെ പരസ്പ സമ്മതത്തോടെയാണ് താരം ക്ലബ് വിട്ടത്. വില്ലിയനും കുടുംബത്തിനും ആഴ്സണലിലെ എല്ലാവരും ശോഭനമായ ഭാവി ആശംസിക്കുന്നതായി ക്ലബ് പ്രസ്താവനയില്‍ പറഞ്ഞു.
2020 ഓഗസ്റ്റില്‍ ചെല്‍സിയില്‍ നിന്നും മൂന്ന് വര്‍ഷക്കരാറില്‍ ഗണ്ണേഴ്‌സിനൊപ്പം ചേര്‍ന്ന താരം ഒരു സീസണ്‍ മാത്രമാണ് ടീമിനൊപ്പം പൂര്‍ത്തിയാക്കിയത്. 2020-21 സീസണില്‍ 37 മത്സരങ്ങളിലാണ് താരം ആഴ്‌സണലിനായി കളത്തിലിറങ്ങിയത്.
2006ല്‍ വില്ലിയന്‍ തന്‍റെ കരിയര്‍ ആരംഭിച്ച ബ്രസീല്‍ ക്ലബായ കൊരിന്ത്യന്‍സില്‍ താരം ചേരുമെന്നാണ് ലഭിക്കുന്ന വിവരം. കാര്യങ്ങള്‍ ആസൂത്രണം ചെയ്‌തതുപോലെ നടക്കാത്തതിനാലാണ് ക്ലബ് വിടാന്‍ തീരുമാനിച്ചതെന്ന് താരം നേരത്തെ ഇന്‍സ്റ്റഗ്രാമിലൂടെ വ്യക്തമാക്കിയിരുന്നു.