വെംബ്ലി: യൂറോ കപ്പ് ഫൈനലില്‍ ആരാധകരുടെ മോശം പെരുമാറ്റവുമായി ബന്ധപ്പെട്ട് ഇംഗ്ലണ്ടിനെതിരെ യുവേഫ നാല് വ്യത്യസ്ത കുറ്റങ്ങൾ ചുമത്തി. ആരാധകര്‍ കളിസ്ഥലത്ത് ആക്രമണം നടത്തുക, വസ്തുക്കൾ എറിയുക, എതിര്‍ രാജ്യത്തിന്‍റെ ദേശീയ ഗാനത്തോട് അസ്വസ്ഥത പ്രകടിപ്പിക്കുക, പടക്കം പൊട്ടിക്കുക എന്നീ കുറ്റങ്ങളാണ് ചുമത്തിയിരിക്കുന്നത്. യുവേഫ ഡിസിപ്ലിനറി റെഗുലേഷന്‍റെ (ഡിആർ) ആർട്ടിക്കിൾ 16ന്‍റെ ലംഘനുമായി ബന്ധപ്പെട്ടതാണ് പ്രസ്തുത കുറ്റങ്ങള്‍.
ഇംഗ്ലണ്ടിനെതിരെ അച്ചടക്ക നടപടികള്‍ ആരംഭിച്ചതായും യുവേഫ പ്രസ്താനവയില്‍ അറിയിച്ചു. അതേസമയം വെംബ്ലിയില്‍ നടന്ന ഫൈനലില്‍ ഇംഗ്ലണ്ടിനെ പെനാള്‍ട്ടി ഷൂട്ടൗട്ടിലാണ് ഇറ്റലി പരാജയപ്പെടുത്തിയത്. മത്സരത്തിന് മുന്‍പ് ശേഷവും ഇംഗ്ലണ്ട് ആരാധകര്‍ക്കെതിരെ നിരവധി പരാതികളുണ്ടായിരുന്നു. ഇതിന്‍റെ അടിസ്ഥാനത്തിലാണ് യുവേഫയുടെ നടപടി.