ബെര്‍ലിന്‍: റൊമേലു ലുക്കാക്കുവിന് പിഴച്ചപ്പോള്‍ ഇറ്റാലിയന്‍ വമ്പന്‍മാരായ ഇന്‍റര്‍ മിലാന് കിരീടം നഷ്‌ടമായി. ലുക്കാക്കുവിന്‍റെ ഓണ്‍ ഗോളിലൂടെ സ്‌പാനിഷ് വമ്പന്‍മാരായ സെവിയ്യ യൂറോപ്പ ലീഗ് കിരീടത്തില്‍ മുത്തമിട്ടു. ജര്‍മനിയില്‍ നടന്ന കിരീട പോരാട്ടത്തില്‍ ഇന്‍റര്‍ മിലാനെ രണ്ടിനെതിരെ മൂന്ന് ഗോളുകള്‍ക്ക് പരാജയപ്പെടുത്തിയാണ് സെവിയ്യ കിരീടത്തില്‍ മുത്തമിട്ടത്.
74ാം മിനുട്ടിലായിരുന്നു ഇന്‍ററിന്‍റെ മുന്നേറ്റ താരം ലുക്കാക്കുവിന്‍റെ ഓണ്‍ ഗോള്‍. ഇന്‍ററിന്‍റെ ഗോള്‍മുഖത്ത് വെച്ച് ഡിയേഗോ കാര്‍ലോസെടുത്ത മനോഹരമായ ബൈസിക്കിള്‍ കിക്ക് ലുക്കാക്കുവിന്‍റെ കാലില്‍ തട്ടി ദിശമാറി വലയിലെത്തി. ഇതോടെ സീസണില്‍ 34 ഗോളുകളുമായി ഇന്‍ററിനായി തിളങ്ങിയ ബെല്‍ജിയന്‍ താരം മറക്കാന്‍ ആഗ്രഹിക്കുന്ന മത്സരങ്ങളില്‍ ഒന്നായി കിരീട പോരാട്ടം മാറുകയും ചെയ്‌തു.
ഇരു ടീമുകളും പൊരുതി കളിച്ച ആദ്യ പകുതിയില്‍ നാല് ഗോളുകളാണ് പിറന്നത്. ഒരു പതിറ്റാണ്ടായി കിരീടങ്ങളൊന്നും സ്വന്തമാക്കാന്‍ സാധിക്കത്ത ഇന്‍റര്‍ മിലാന് കിരീടം മാത്രം ലക്ഷ്യമിട്ടാണ് കലാശപ്പോരിന് ഇറങ്ങിയത്. ഇതിന്‍റെ ദൃഷ്‌ടാന്തങ്ങള്‍ ആദ്യ മിനിട്ടുകളില്‍ തന്നെ പുറത്ത് വരുകയും ചെയ്‌തു. ഒമ്പാതം മിനിട്ടില്‍ ലുക്കാക്കു ഇന്‍ററിനായ പെനാല്‍ട്ടിയിലൂടെ ഗോള്‍ സ്വന്തമാക്കി. ബെല്‍ജിയന്‍ താരത്തിന്‍റെ ക്ലിനിക്കല്‍ ഷോട്ട് ഗോളി ബോണോയുടെ കണക്കുകൂട്ടലുകള്‍ തെറ്റിച്ച് ബോക്‌സിന്‍റെ ബോട്ടം ലഫ്‌റ്റ് കോര്‍ണറിലാണ് ചെന്ന് പതിച്ചത്.