സാന്‍ യുവാന്‍: ഖത്തര്‍ ലോകകപ്പിന് ടിക്കറ്റുറപ്പിച്ച് അര്‍ജന്‍റീന. ബുധനാഴ്ച പുലര്‍ച്ചെ നടന്ന ലാറ്റിനമേരിക്കന്‍ യോഗ്യത മത്സരത്തില്‍ ബ്രസീലിനെതിരെ അര്‍ജന്‍റീന ഗോള്‍ രഹിത സമനില വഴങ്ങിയിരുന്നു. അതിനു ശേഷം നടന്ന മത്സരത്തില്‍ ചിലി ഇക്വഡോറിനോട് ഏകപക്ഷീയമായ രണ്ട് ഗോളിന് തോല്‍വി വഴങ്ങിയതോടെയാണ് മെസിക്കും സംഘത്തിനും നേരിട്ട് യോഗ്യത ലഭിച്ചത്.
അര്‍ജന്‍റീനയുടെ ആദ്യ ഇലവനില്‍ മെസി ഇടം പിടിച്ചപ്പോള്‍ തുടയ്ക്ക് പരിക്കേറ്റ നെയ്‌മറെ പുറത്തിരുത്തിയാണ് കാനറികളിറങ്ങിയത്. ഇരു ടീമും കാര്യമായ ഗോളവസരങ്ങളൊന്നും സൃഷ്ടിക്കാതിരുന്ന മത്സരത്തില്‍ 56 ശതമാനവും പന്ത് കൈവശം വെച്ചത് അര്‍ജന്‍റീനയാണ്.
61ാം മിനിട്ടില്‍ ഫ്രെഡിന്‍റെ ഷോട്ട് പോസ്റ്റിലിടിച്ച് മടങ്ങിയത് ബ്രസീലിന് തിരിച്ചടിയായി. കളിയുടെ അവസാന നിമിഷം മെസിയുടെ ലോങ് റേഞ്ചര്‍ ബ്രസീല്‍ ഗോളി ആലിസണ്‍ തടുത്തിട്ടതും മത്സരഫലത്തെ നിര്‍ണയിച്ചു. ഇതോടെ തോൽവി അറിയാതെ 27 മത്സരങ്ങൾ അർജന്‍റീന പൂർത്തിയാക്കി.