മാഞ്ചസ്റ്റർ: ഇംഗ്ലീഷ് പ്രീമിയർ ലീഗിൽ തകർപ്പൻ ജയത്തോടെ 2021ന് വിടനൽകി മാഞ്ചസ്റ്റർ യുണൈറ്റഡ്. ബേണ്‍ലിക്കെതിരെ ഒന്നിനെതിരെ മൂന്ന് ഗോളുകൾക്കായിരുന്നു യുണൈറ്റഡിന്‍റെ വിജയം. യുണൈറ്റഡിനായി സൂപ്പർ താരം ക്രിസ്റ്റ്യാനോ റൊണാൾഡോ, സ്കോട്ട് മക്‌ടോമിനെ എന്നിവർ ഗോളുകൾ നേടി. മൂന്നാം ഗോൾ ബെൻ മീയുടെ വക സെൽഫ് ഗോളായിരുന്നു.
മത്സരത്തിന്‍റെ തുടക്കം മുതൽ ആക്രമിച്ച് കളിച്ച യുണൈറ്റഡ് 8-ാം മിനിട്ടിൽ തന്നെ ഗോൾ നേടി. റൊണാൾഡോ നൽകിയ പാസ് സ്വീകരിച്ച സ്കോട്ട് മക്‌ടോമി മനോഹരമായി പന്ത് വലയിലെത്തിക്കുകയായിരുന്നു. പിന്നാലെ 27-ാം മിനിട്ടിൽ ബേണ്‍ലിയുടെ പ്രതിരോധതാരം ബെൻ മീയുടെ വക സെൽഫ് ഗോൾ യുണൈറ്റഡിന്‍റെ ലീഡുയർത്തി. സാഞ്ചോയുടെ ഷോട്ട് ബെൻ മീയുടെ കാലിൽ തട്ടി വലയിലെത്തുകയായിരുന്നു.
പിന്നാലെ 35-ാം മിനിട്ടിൽ ഗോൾ നേടി റൊണാൾഡോ ബേണ്‍ലിയെ വീണ്ടും ഞെട്ടിച്ചു. സ്കോട് മക്‌ടൊമിനെയുടെ ഷോട്ട് ക്രോസ് ബാറിലിടിച്ച് എത്തിയത് റൊണാൾഡോയുടെ കാലുകളിലേക്ക്. ആളൊഴിഞ്ഞ പോസ്റ്റിലേക്ക് അനായാസം പന്ത് തട്ടിയിട്ട് റൊണാൾഡോ സീസണിലെ തന്‍റെ എട്ടാം ഗോൾ സ്വന്തമാക്കി.