ലണ്ടൻ: ഇംഗ്ലീഷ് പ്രീമിയർ ലീഗിൽ ന്യൂകാസിലിനെ തകർത്ത് കരുത്തരായ ലിവർപൂൾ. ലിവർപൂളിന്‍റെ തട്ടകമായ ആൽഫീൽഡിൽ നടന്ന മത്സരത്തിൽ ഒന്നിനെതിരെ മൂന്ന് ഗോളുകൾക്കായിരുന്നു ആതിഥേയരുടെ വിജയം. ന്യൂകാസിലിനെ തരിപ്പണമാക്കുന്ന വിധത്തിലായിരുന്നു മത്സരത്തിലുടനീളം ലിവർപൂളിന്‍റെ പ്രകടനം.
ലിവർപൂളിനെ ഞെട്ടിച്ച് മത്സരത്തിന്‍റെ 7-ാം മിനിട്ടിൽ ന്യൂകാസിലാണ് ആദ്യ ലീഡ് സ്വന്തമാക്കിയത്. ജാനോ ഷെൽവിയാണ് ഗോൾ നേടിയത്. ഇതോടെ ഉണർന്നുകളിച്ച ലിവർപൂൾ 21-ാം മിനിട്ടിൽ ഡിയാഗോ ജോട്ടയിലുടെ സമനിലഗോൾ സ്വന്തമാക്കി. തൊട്ടുപിന്നാലെ 25-ാം മിനിട്ടിൽ മുഹമ്മദ് സലയിലൂടെ ലിവർപൂൾ രണ്ടാം ഗോളും സ്വന്തമാക്കി.
രണ്ടാം പകുതിയിൽ 87-ാം മിനിറ്റിൽ ലിവർപൂൾ മൂന്നാമത്തെ ഗോളും സ്വന്തമാക്കി. തകർപ്പനൊരു ലോങ് റേഞ്ചറിലൂടെ ട്രെന്‍റ് അലക്‌സാണ്ടർ അർനോൾഡാണ് ന്യൂകാസിലിന്‍റെ വല കുലുക്കിയത്. വിജയത്തോടെ 17 മത്സരങ്ങളിൽ നിന്ന് 40 പോയിന്‍റുമായി പട്ടികയിൽ രണ്ടാം സ്ഥാനത്താണ് ലിവർപൂൾ.