പാരീസ് : ഫ്രഞ്ച് ലീഗ് വണ്ണിലെ കിരീട ജേതാക്കളെ നിര്‍ണയിക്കുന്ന ഫോട്ടോ ഫിനിഷ് മത്സരങ്ങള്‍ക്ക് തിങ്കളാഴ്‌ച പുലര്‍ച്ചെ തുടക്കമാകും. ടേബിള്‍ ടോപ്പറായ ലില്ലിയും നിലവിലെ ചാമ്പ്യന്‍മാരായ പിഎസ്‌ജിയും ലീഗിലെ രണ്ട് മത്സരങ്ങളിലായി ഇറങ്ങും. രണ്ടാം സ്ഥാനക്കാരായ പിഎസ്‌ജിയേക്കാള്‍ ഒരു പോയിന്‍റിന്‍റെ മുന്‍തൂക്കം മാത്രമേ ടേബിള്‍ ടോപ്പറായ ലില്ലിക്കുള്ളൂ. ലീഗിലെ അവസാന റൗണ്ട് മത്സരങ്ങളാണ് ഇനി നടക്കാനുള്ളത്. 20 ടീമുകള്‍ക്കും ഓരോ മത്സരം വീതമാണ് ശേഷിക്കുന്നത്.
ദുര്‍ബലരായ ബ്രെസ്റ്റാണ് ലീഗിലെ അവസാന മത്സരത്തില്‍ പിഎസ്‌ജിയുടെ എതിരാളികള്‍. ലില്ലി നിര്‍ണായക മത്സരത്തില്‍ ആങ്കേഴ്‌സിനെയും നേരിടും. ആങ്കേഴ്‌സിനെതിരായ മത്സരത്തില്‍ ലില്ലി സമനിലയെങ്കിലും വഴങ്ങിയാലേ പിഎസ്‌ജിയുെടെ പ്രതീക്ഷകള്‍ സജീവമാകൂ. ലില്ലി സമനില വഴങ്ങുകയും പിഎസ്ജി ജയം സ്വന്തമാക്കുകയും ചെയ്താല് നെയ്‌മര്‍ക്കും കൂട്ടര്‍ക്കും കപ്പ് നിലനിര്‍ത്താനാകും. ആറാം തവണ ലീഗില്‍ കപ്പുയര്‍ത്താനുള്ള തയ്യാറെടുപ്പിലാണ് ഫ്രഞ്ച് കരുത്തര്‍. പുതിയ പരിശീലകന്‍ പൊച്ചെറ്റീനോയ്ക്ക് കീഴില്‍ രണ്ടാമത്തെ കപ്പ് കൂടിയാണ് പിഎസ്ജി ലക്ഷ്യമിടുന്നത്. മറുഭാഗത്ത് പിഎസ്ജി പരാജയപ്പെട്ടാല്‍ ലില്ലിക്ക് ഇത്തവണ കപ്പുറപ്പിക്കാം. 2010-11 സീസണ് ശേഷം ആദ്യമായാണ് ലില്ലിക്ക് കപ്പുയര്‍ത്താന്‍ അവസരം ലഭിക്കുന്നത്. ഒരു ദശാബ്‌ദത്തിന് ശേഷം കിരീടം നേടാനുള്ള അവസരമാണ് ലില്ലിക്ക് ലഭിച്ചിരിക്കുന്നത്.