മാഡ്രിഡ്: സ്പാനിഷ് ലാലിഗയില്‍ ബാഴ്‌സലോണക്ക് ശേഷിക്കുന്ന രണ്ട് മത്സരങ്ങളും നിര്‍ണായകം. ഒസാസുനക്കും ആല്‍വേസിനം എതിരായ മത്സരങ്ങളില്‍ വിജയിച്ചാലെ ബാഴ്‌സലോണക്ക് ഈ സീസണില്‍ കിരീടം സ്വന്തമാക്കാനാകുമെന്ന പ്രതീക്ഷയെങ്കിലും നിലനിര്‍ത്താനാകൂ.
അതേസമയം ലീഗിലെ പോയിന്‍റ് പട്ടികയില്‍ ഒന്നാം സ്ഥാനത്തുള്ള റയല്‍ മാഡ്രിഡ് അടുത്ത മത്സരത്തില്‍ വില്ലാറയലിനെ നേരിടും. ജയിച്ചാല്‍ സീസണില്‍ റയലിന് കിരീടം ഉറപ്പിക്കാം. ഒസാസുനക്ക് എതിരായ മത്സരത്തില്‍ ബാഴ്‌സലോണ പരാജയപ്പെട്ടാലും റയലിന് കപ്പില്‍ മുത്തമിടാന്‍ സാധിക്കും. ഇരു മത്സരങ്ങളും ജൂലൈ 17ന് പുലര്‍ച്ചെ 12.30ന് നടക്കും. നിലവില്‍ ലീഗിലെ പോയിന്‍റ് പട്ടികയില്‍ 83 പോയിന്‍റുമായി റയല്‍ മാഡ്രിഡ് ഒന്നാം സ്ഥാനത്താണ്. രണ്ടാം സ്ഥാനത്തുള്ള ബാഴ്‌സലോണക്ക് 79 പോയിന്‍റാണുള്ളത്.