ലിവര്‍പൂള്‍: ഇംഗ്ലീഷ് പ്രീമിയര്‍ ലീഗില്‍ നാല് വര്‍ഷത്തോളമായി തുടരുന്ന ലിവര്‍പൂളിന്‍റെ ഹോം ഗ്രൗണ്ട് ആധിപത്യത്തിന് അവസാനം. ഇന്ന് പുലര്‍ച്ചെ ആന്‍ഫീല്‍ഡില്‍ നടന്ന മത്സരത്തില്‍ ബേണ്‍ലിയോട് മറുപടിയില്ലാത്ത ഒരു ഗോളിന് പരാജയപ്പെട്ടതോടെയാണ് ചെമ്പടയുടെ കുതിപ്പ് അവസാനിച്ചത്. ബേണ്‍ലിക്ക് വേണ്ടി രണ്ടാം പകുതിയില്‍ പെനാല്‍ട്ടിയിലൂടെ ഇംഗ്ലീഷ് താരം ആഷ്‌ലി ബേണ്‍സാണ് വല കുലുക്കിയത്. ലിവര്‍പൂളിന്‍റെ വല കാത്ത അലിസണ്‍ ബെക്കറുടെ പിഴവാണ് പെനാല്‍ട്ടിയില്‍ കലാശിച്ചത്. ബേണ്‍ലിയുടെ സ്‌ട്രൈക്കര്‍ ബേണ്‍സ് പന്തുമായി മുന്നേറുന്നതിനിടെ ബോക്‌സിനുള്ളില്‍ വെച്ചായിരുന്നു അലിസണിന്‍റെ ഫൗള്‍.
മത്സരത്തില്‍ ഉടനീളം പന്തടക്കത്തിന്‍റെ കാര്യത്തിലും ഷോട്ടുകളുടെ കാര്യത്തിലും മുന്നില്‍ നിന്ന ലിവര്‍പൂളിന് ഗോള്‍ മാത്രം കണ്ടെത്താന്‍ സാധിച്ചില്ല. ആതിഥേയര്‍ക്ക് 28 ഷോട്ടുകള്‍ തൊടുക്കാന്‍ സാധിച്ചപ്പോള്‍ ബേണ്‍ലിക്ക് ആറ് ഷോട്ടുകള്‍ മാത്രമെ തൊടുക്കാനായുള്ളൂ. പാസുകളുടെ കൃത്യതയിലും ലിവര്‍പൂളായിരുന്നു മുന്നില്‍.