ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ പെയ്‌ത് തീര്‍ന്നത് ഗോള്‍ മഴയുടെ ശനിയാഴ്‌ച. ഇന്ന് നടന്ന മൂന്ന് മത്സരങ്ങളിലായി 15 ഗോളുകളാണ് പിറന്നത്. ബേണ്‍ലിക്കെതിരായ പ്രീമിയര്‍ ലീഗ് പോരാട്ടത്തില്‍ നാലടിച്ച് ലീഡ്‌സ് യുണൈറ്റഡ് ജയം ആഘോഷമാക്കി മാറ്റിയപ്പോള്‍ സതാംപ്‌റ്റണും വിട്ടുകൊടുത്തില്ല. ഫുള്‍ഹാമിനെ ഒന്നിനെതിരെ മൂന്ന് ഗോളുകള്‍ക്കാണ് സതാംപ്റ്റണ് പരാജയപ്പെടുത്തിയത്.
നാലടിച്ച് ലീഡ്‌സ്
ബേണ്‍ലിക്കെതിരെ മറുപടിയില്ലാത്ത നാല് ഗോളുകള്‍ക്കാണ് ലീഡ്‌സ് ജയിച്ച് കയറിയത്. രണ്ടാം പകുതിയില്‍ പകരക്കാരനായി എത്തിയ സ്‌പാനിഷ്‌ സ്ട്രൈക്കര്‍ റോഡ്രിഗസിന്‍റെ ഇരട്ട ഗോളിന്‍റെ മികവിലായിരുന്നു ലീഡ്‌സിന്‍റെ ജയം. രണ്ടാം പകുതിയില്‍ റോഡ്രിഗസിനെ കൂടാതെ ജാക്‌ ഹാരിസണും ആദ്യ പകുതിയില്‍ മറ്റിയസ് ക്ലിച്ചും ലീഡ്‌സിനായി വല കുലുക്കി.