ലണ്ടന്‍: വണ്ടര്‍ ഗോളുമായി മാഞ്ചസ്റ്റര്‍ യുണൈറ്റഡിന്‍റെ യുറുഗ്വന്‍ ഫോര്‍വേഡ് എഡിസണ്‍ കവാനി. ഫുള്‍ഹാമിനെതിരായ ഹോം ഗ്രൗണ്ട് പോരാട്ടത്തില്‍ ആരാധകരെ സാക്ഷിയാക്കിയാണ് കവാനിയുടെ തകര്‍പ്പന്‍ ഗോള്‍. ഒരു വര്‍ഷത്തിന് ശേഷം ഓള്‍ഡ് ട്രാഫോഡിലെ ഗാലറിയിലേക്ക് തിരിച്ചെത്തിയ ആരാധകര്‍ക്കുള്ള വിരുന്നായി കവാനിയുടെ ഗോള്‍. ആദ്യ പകുതിയുടെ പതിനഞ്ചാം മിനിട്ടില്‍ 40 വാര അകലെ നിന്നും തൊടുത്ത ലോങ്ങ് റേഞ്ചറിലൂടെയാണ് യുറുഗ്വന്‍ ഫോര്‍വേഡ് പന്ത് വലയിലെത്തിച്ചത്.
ബോക്‌സിന് പുറത്തായിരുന്ന ഫുള്‍ഹാമിന്‍റെ ഫ്രഞ്ച് ഗോളി അരിയോളയെ കബളിപ്പിച്ച് പന്ത് വലയിലെത്തി. പോര്‍ച്ചുഗീസ് മിഡ്‌ഫീല്‍ഡര്‍ ബ്രൂണോ ഫെര്‍ണാണ്ടസിന്‍റെ അസിസ്റ്റിലൂടെയാണ് കവാനി തകര്‍പ്പന്‍ ഗോള്‍ നേടിയത്. പ്രീമിയര്‍ ലീഗിലെ ഈ സീസണിലെ മികച്ച ഗോളുകളിലൊന്നാണ് ഓള്‍ഡ് ട്രാഫോഡില്‍ പിറന്നത്. പ്രീമിയര്‍ ലീഗിലെ ഈ സീസണില്‍ യുണൈറ്റഡിന് വേണ്ടി 10 ഗോളുകളാണ് കവാനി അടിച്ച് കൂട്ടിയത്.