ലിസ്‌ബണ്‍: ദീപാവലി ആഘോഷങ്ങള്‍ക്ക് പൊലിമ കൂട്ടാന്‍ യുവേഫ നേഷന്‍സ് ലീഗില്‍ ഇന്ന് വമ്പന്‍ പോരാട്ടങ്ങള്‍. രാത്രി 7.30തോടെ ആരംഭിക്കുന്ന മത്സരങ്ങള്‍ക്ക് പുലര്‍ച്ചെയാകുന്നതോടെ നിറം വര്‍ദ്ധിക്കും. ലോക ഫുട്‌ബോളിലെ വമ്പന്‍മാരാണ് വരാനിരിക്കുന്ന മണിക്കൂറുകളില്‍ കൊമ്പുകോര്‍ക്കാന്‍ പോകുന്നത്.
ലോകകപ്പ് ജേതാക്കളായ ഫ്രാന്‍സ് രാത്രി 1.15ന് സൂപ്പര്‍ താരം ക്രിസ്റ്റ്യാനോ റൊണാള്‍ഡോയുടെ നേതൃത്വത്തിലുള്ള പറങ്കിപ്പടയെ നേരിടും. പോര്‍ച്ചുഗലിലെ ലിസ്‌ബണിലാണ് സൂപ്പര്‍ പോരാട്ടം നടക്കുക. സൂപ്പര്‍ താരം കിലിയന്‍ എംബാപ്പെ ബൂട്ടണിയുന്ന കാര്യം സംശയമാണ്. പരിക്കില്‍ നിന്നും മോചിതനായ എംബാപ്പെ കഴിഞ്ഞ ദിവസം ദേശീയ ടീമിന് വേണ്ടി പരിശീലനം നടത്താന്‍ എത്തിയിരുന്നു. പിഎസ്‌ജിക്ക് വേണ്ടിയുള്ള മത്സരത്തിനിടെയാണ് എംബാപ്പെയുടെ കാലിന് പരിക്കേറ്റത്.