മത്സരത്തിനിടെ ഗോൾകീപ്പറുമായി കൂട്ടിയിടിച്ചു, പിന്നാലെ ഹൃദയാഘാതം ; അൾജീരിയൻ ഫുട്ബോളർക്ക് ദാരുണാന്ത്യം

അൾജീരിയൻ രണ്ടാം ഡിവിഷൻ ഫുഡ്‌ബോൾ ലീഗ് മത്സരത്തിനിടെയാണ് സംഭവം

അള്‍ജിയേഴ്‌സ് : മത്സരത്തിനിടെ സ്വന്തം ഗോൾകീപ്പറുമായി കൂട്ടിയിടിച്ച് വീണ അൾജീരിയൻ ഫുട്ബോൾ താരം ഹൃദയാഘാതത്തെ തുടർന്ന് മരിച്ചു. അൾജീരിയൻ രണ്ടാം ഡിവിഷൻ ഫുഡ്‌ബോൾ ലീഗ് മത്സരത്തിനിടെ എം.സി സൈദയുടെ സോഫിയൻ ലൂക്കാർ(28) എന്ന താരത്തിനാണ് ദാരുണാന്ത്യം സംഭവിച്ചത്.

എം.സി സൈദ- എ.എസ്.എം ഒറാൻ മത്സരത്തിനിടെയായിരുന്നു സംഭവം. മത്സരത്തിന്‍റെ ആദ്യ പകുതിക്കിടെ ലൂക്കാർ തന്‍റെ ടീമിലെ തന്നെ ഗോൾ കീപ്പറുമായി കൂട്ടിയിടിച്ച് വീഴുകയായിരുന്നു.

പിന്നാലെ വൈദ്യസഹായം നേടിയ ശേഷം കളത്തിലിറങ്ങിയ താരം 10 മിനിട്ടിന് ശേഷം കുഴഞ്ഞ്‌ വീണു. ഉടൻ തന്നെ താരത്തിന് പ്രാഥമിക ശുശ്രൂഷകൾ നൽകിയ ശേഷം ആശുപത്രിയിൽ എത്തിച്ചെങ്കിലും മരണം സംഭവിക്കുകയായിരുന്നു.