സിൽഹെറ്റ്: വനിത ഏഷ്യ കപ്പ് ടി20 ക്രിക്കറ്റില്‍ പാകിസ്ഥാനെതിരെ ഇന്ത്യയ്‌ക്ക് ഫീല്‍ഡിങ്. ടോസ് നേടിയ പാകിസ്ഥാന്‍ ക്യാപ്റ്റന്‍ ബിസ്മ മറൂഫ് ബാറ്റിങ് തെരഞ്ഞെടുത്തു. കഴിഞ്ഞ മത്സരത്തിലെ ടീമില്‍ രണ്ട് മാറ്റങ്ങളോടെയാണ് ഇന്ത്യ ഇറങ്ങുന്നത്. ക്യാപ്റ്റന്‍ ഹര്‍മന്‍പ്രീത് കൗര്‍, രാധ യാദവ് എന്നിവര്‍ പ്ലേയിങ്‌ ഇലവനിലേക്ക് തിരിച്ചെത്തി.
ടൂര്‍ണമെന്‍റിലെ നാലാം മത്സരത്തിനാണ് ഇരു സംഘവും ഇറങ്ങുന്നത്. കളിച്ച മൂന്ന് മത്സരങ്ങളും വിജയിച്ച ഇന്ത്യ നിലവിലെ പോയിന്‍റ് പട്ടികയില്‍ തലപ്പത്തും, ഒരു മത്സരത്തില്‍ തോല്‍വി വഴങ്ങിയ പാകിസ്ഥാന്‍ രണ്ടാം സ്ഥാനത്തുമാണ്. അന്താരാഷ്‌ട്ര ടി20യിലെ നേര്‍ക്കുനേര്‍ പോരാട്ടങ്ങളില്‍ പാകിസ്ഥാനെതിരെ ഇന്ത്യയ്‌ക്ക് വ്യക്തമായ ആധിപത്യമുണ്ട്.