ട്രിനിഡാഡ്: ഇന്ത്യക്കെതിരായ രണ്ടാം ഏകദിനത്തിൽ ടോസ് നേടിയ വെസ്റ്റ് ഇൻഡീസ് ബാറ്റിങ് തെരഞ്ഞെടുത്തു. കഴിഞ്ഞ മത്സരത്തിൽ നിന്ന് ഓരോ മാറ്റവുമായാണ് രണ്ട് ടീമുകളും ഇന്ന് കളത്തിലിറങ്ങുന്നത്. ഇന്ത്യൻ നിരയിൽ പ്രസിദ്ധ് കൃഷ്‌ണക്ക് പകരം ആവേശ് ഖാൻ ഇടം നേടിയപ്പോൾ വിൻഡീസ് നിരയിൽ ഗുഡകേഷ് മോട്ടിക്ക് പകരം ഹെയ്‌ഡൻ വാൽഷ് ഇടം പിടിച്ചു.
ഏകദിനത്തിൽ ആവേശ് ഖാന്‍റെ അരങ്ങേറ്റ മത്സരം കൂടിയാണിത്. മലയാളി താരം സഞ്ജു സാംസണും ടീമിൽ സ്ഥാനം നിലനിർത്തിയിട്ടുണ്ട്. ആദ്യമത്സത്തിൽ നേടിയ വിജയത്തിന്‍റെ ആത്മവിശ്വാസത്തിലാണ് ഇന്ത്യൻ ടീം ഇന്നത്തെ മത്സരത്തിനെത്തുന്നത്.
ഇന്നത്തെ മത്സരം വിജയിച്ചാൽ മൂന്ന് മത്സരങ്ങളുടെ പരമ്പര ഇന്ത്യക്ക് സ്വന്തമാക്കാം. അതേസമയം അവസാന നിമിഷം വഴങ്ങിയ തോൽവിക്ക് പകരം വീട്ടുക എന്നതാവും വിൻഡീസിന്‍റെ ലക്ഷ്യം.