ഹൈദരാബാദ്: ശ്രീലങ്കന്‍ പര്യനടത്തില്‍ ലഭിച്ച അവസരം മുതലാക്കാനാവുന്നില്ലെന്ന വിര്‍ശനങ്ങള്‍ക്കിടെ ഡിആര്‍എസിലെ തെറ്റായ തീരുമാനത്തിന്‍റെ പേരില്‍ മലയാളി താരം സഞ്ജു സാംസണെതിരെ സോഷ്യല്‍ മീഡിയ. രണ്ടാം ടി20യിലെ എട്ടാം ഓവറിലാണ് സഞ്ജുവിന്‍റെ തെറ്റായ തീരുമാനം വന്നത്. കുല്‍ദീപ് യാദവിന്‍റെ പന്തില്‍ ലങ്കന്‍ ക്യാപ്റ്റന്‍ ദാസുൻ ഷാനക സ്വീപ്പ് ഷോട്ടിന് ശ്രമിച്ചെങ്കിലും കണക്ക് കൂട്ടലുകള്‍ തെറ്റിച്ച പന്ത് പാഡില്‍ പതിച്ചു.
അപ്പീല്‍ ഫീല്‍ഡ് അമ്പയര്‍ നിഷേധിച്ചതോടെ ഡിആര്‍എസ് എടുക്കാന്‍ കുല്‍ദീപ് ശ്രമം നടത്തിയെങ്കിലും വിക്കറ്റിന് പിന്നിലുണ്ടായിരുന്ന സഞ്ജു പിന്തുണച്ചില്ല. ബോള്‍ സ്റ്റമ്പിനേക്കാള്‍ ഉയരത്തിലാണെന്നായിരുന്നു സഞ്ജു നിലപാട് എടുത്തത്. എന്നാല്‍ റീപ്ലേകളില്‍ പന്ത് മിഡില്‍ സ്റ്റമ്പില്‍ പതിക്കുന്നതായി തെളിഞ്ഞു.