ക്രൈസ്റ്റ്ചര്‍ച്ച്:ന്യൂസിലന്‍ഡില്‍ നടന്ന ത്രിരാഷ്‌ട്ര പരമ്പര പാകിസ്ഥാന്. ഫൈനലില്‍ ആതിഥേയരായ ന്യൂസിലന്‍ഡിനെ അഞ്ച് വിക്കറ്റിനാണ് ബാബര്‍ അസമും സംഘവും തോല്‍പ്പിച്ചത്. ആദ്യം ബാറ്റ് ചെയ്‌ത ന്യൂസിലന്‍ഡ് ഏഴ് വിക്കറ്റ് നഷ്‌ടത്തില്‍ 163 റണ്‍സെടുത്തു.
മറുപടിക്കിറങ്ങിയ പാകിസ്ഥാന് 19.3 ഓവറില്‍ അഞ്ച് വിക്കറ്റ് നഷ്‌ടത്തില്‍ 168 റണ്‍സ് നേടി വിജയം ഉറപ്പിച്ചു. 22 പന്തില്‍ 38 റണ്‍സെടുത്ത് പുറത്താവാതെ നിന്ന മുഹമ്മദ് നവാസാണ് പാകിസ്ഥാന്‍റെ ടോപ് സ്‌കോറര്‍. 14 പന്തില്‍ 25 റണ്‍സുമായി പുറത്താവാതെ നിന്ന ഇഫ്‌തിഖര്‍ അഹമ്മദും തിളങ്ങി.
15 പന്തില്‍ 31 റണ്‍സെടുത്ത ഹൈദര്‍ അലിയും നിര്‍ണായകമായി. മുഹമ്മദ് റിസ്‌വാന്‍ (29 പന്തില്‍ 34), ബാബര്‍ അസം (14 പന്തില്‍ 15), ഷാന്‍ മസൂദ് (21 പന്തില്‍ 19), ആസിഫ്‌ അലി (2 പന്തില്‍ 1) എന്നിങ്ങനെയാണ് മറ്റ് താരങ്ങളുടെ സംഭാവന. കിവീസിനായി മൈക്കൽ ബ്രേസ്‌വെൽ നാല് ഓവറില്‍ 14 റണ്‍സ് മാത്രം വഴങ്ങി രണ്ട് വിക്കറ്റ് വീഴ്‌ത്തി. ടിം സൗത്തി, ഇഷ് സോധി, ബ്ലെയർ ടിക്‌നർ എന്നിവര്‍ക്ക് ഓരോ വിക്കറ്റുണ്ട്.