ദുബായ്‌: ലിമിറ്റഡ് ഓവർ ക്രിക്കറ്റില്‍ ഇന്ത്യ സമ്മാനിച്ച എക്കാലത്തെയും മികച്ച താരങ്ങളിൽ ഒരാളാണ് സുരേഷ്‌ റെയ്‌ന. 2020 ഓഗസ്റ്റ് 15ന് അന്താരാഷ്‌ട്ര ക്രിക്കറ്റിൽ നിന്ന് വിരമിക്കൽ പ്രഖ്യാപിച്ച റെയ്‌ന 2022 സെപ്‌റ്റംബർ ആറിന് ഐപിഎല്ലും മതിയാക്കിയിരുന്നു. ഇപ്പോൾ വീണ്ടും ക്രിക്കറ്റിൽ സജ്ജീവ സാന്നിധ്യമാകാൻ ഒരുങ്ങുകയാണ് മിസ്റ്റർ ഐപിഎൽ കൂടിയായ റെയ്‌ന.
അബുദാബി ടി10 ലീഗിൽ ഡെക്കാൻ ഗ്ലാഡിയേറ്റേഴ്‌സുമായാണ് റെയ്‌ന കരാർ ഒപ്പുവെച്ചിരിക്കുന്നത്. റെയ്‌ന ടീമിന്‍റെ ഭാഗമായ വിവരം ഡെക്കാൻ ഗ്ലാഡിയേറ്റേർ തന്നെയാണ് ഔദ്യോഗിക ട്വിറ്റർ പേജിലൂടെ അറിയിച്ചത്. 'ലോകകപ്പ് ജേതാവ് റെയ്‌ന ഞങ്ങളുടെ ടീമിനായി കരാറിൽ ഒപ്പുവെച്ചു.
ഇന്ത്യയുടെ എക്കാലത്തെയും മികച്ച വൈറ്റ്‌ ബോൾ ക്രിക്കറ്ററിൽ ഒരാളായ റെയ്‌ന ആദ്യമായി അബുദാബി ടി10 ലീഗിൽ അണിനിരക്കും. ഞങ്ങൾക്ക് കാത്തിരിക്കാനാവില്ല.' ഡെക്കാൻ ഗ്ലാഡിയേറ്റേർ കുറിച്ചു. നിക്കോളാസ് പുരാന്‍, ആന്ദ്രെ റസല്‍, ജേസണ്‍ റോയ്, ഓഡിന്‍ സ്‌മിത്ത്, തസ്‌കിന്‍ അഹമ്മദ് തുടങ്ങിയ മികച്ച താരനിരയാണ് ഡെക്കാൻ ഗ്ലാഡിയേറ്റേറിൽ റെയ്‌നക്കൊപ്പം അണിനിരക്കുന്നത്.