ന്യൂഡല്ഹി: കോമണ്വെല്ത്ത് ഗെയിംസില് മെഡല് നേടിയ ഇന്ത്യന് വനിത ക്രിക്കറ്റ് ടീമിനെ അഭിനന്ദിച്ചുള്ള ട്വീറ്റില് പുലിവാല് പിടിച്ച് ബിസിസിഐ അധ്യക്ഷന് സൗരവ് ഗാംഗുലി. ഫൈനലില് ഓസ്ട്രേലിയയോട് തോല്വി വഴങ്ങിയ ഇന്ത്യയ്ക്ക് വെള്ളിയാണ് ലഭിച്ചത്. ഇതിന് പിന്നാലെ ടീമിനെ അഭിനന്ദിച്ച് രംഗത്തെത്തിയ ഗാംഗുലി, ജയിക്കാന് കഴിയുമായിരുന്ന ഒരു മത്സരത്തിലെ തോല്വിയില് നിരാശരായാവും അവര് മടങ്ങുകയെന്നുമാണ് ട്വീറ്റ് ചെയ്തത്.
ബിസിസിഐ അധ്യക്ഷന്റെ ഈ ട്വീറ്റിനെതിരെയാണ് ഒരുകൂട്ടം ആരാധകര് രംഗത്തെത്തിയത്. വെള്ളി നേടിയതിന് സന്തോഷിക്കേണ്ട അവര്, ഇത്തരത്തിലുള്ള ഒരു ബോര്ഡ് അധ്യക്ഷനെ ലഭിച്ചതിനാണ് നിരാശപ്പെടേണ്ടത് എന്നാണ് ചിലര് പറയുന്നത്. ലോകത്തിലെ ഏറ്റവും ശക്തമായ ക്രിക്കറ്റ് ബോര്ഡിന്റെ തലപ്പത്തിരിക്കുന്ന ഒരാള് ഇത്തരത്തില് പ്രതികരിക്കുന്നത് മോശമാണെന്നും ചിലര് പറയുന്നു.
എന്നാല് ഗാംഗുലിയെ അനുകൂലിച്ചും ചിലര് രംഗത്തെത്തിയിട്ടുണ്ട്. സ്വര്ണം അര്ഹിച്ചിരുന്ന അവര്ക്ക് അത് ലഭിക്കാത്തതില് നിരാശയുണ്ടാകുമെന്നും, വിജയിക്കാമായിരുന്ന മത്സരമാണ് ഇന്ത്യ കൈവിട്ടതെന്നാണ് ഗാംഗുലി ചൂണ്ടിക്കാട്ടാന് ശ്രമിച്ചതെന്നുമാണ് ഇക്കൂട്ടര് പറയുന്നത്.