മൊഹാലി :14 മാസത്തിന് ശേഷം ടി20 ടീമിലേക്കുള്ള മടങ്ങി വരവ് ആഘോഷമാക്കാനുള്ള തയ്യാറെടുപ്പിലാണ് ഇന്ത്യന്‍ നായകന്‍ രോഹിത് ശര്‍മ (Rohit Sharma). ടി20 ലോകകപ്പ് മുന്നില്‍ നില്‍ക്കെ ടീമിലേക്കുള്ള രോഹിത് ശര്‍മയുടെ തിരിച്ചുവരവ് ആരാധകരും പ്രതീക്ഷയോടെയാണ് നോക്കി കാണുന്നത്. കഴിഞ്ഞ ടി20 ലോകകപ്പില്‍ ആയിരുന്നു രോഹിത് ക്രിക്കറ്റിന്‍റെ കുട്ടി ഫോര്‍മാറ്റില്‍ അവസാനമായി ഇന്ത്യയ്‌ക്കായി കളത്തിലിറങ്ങിയത്.
പിന്നീട്, ടി20യില്‍ രോഹിത് ശര്‍മയുടെ അഭാവത്തില്‍ ഹര്‍ദിക് പാണ്ഡ്യയും (Hardik Pandya) സൂര്യകുമാര്‍ യാദവും (Suryakumar Yadav) ഇന്ത്യന്‍ ടീമിനെ നയിച്ചു. ഹര്‍ദിക്കിന് കീഴില്‍ തന്നെയാകും ഇന്ത്യ വരുന്ന ടി20 ലോകകപ്പും കളിക്കുക എന്ന അഭ്യൂഹങ്ങള്‍ ശക്തമായി തുടരുന്നതിനിടെയായിരുന്നു രോഹിത് അഫ്‌ഗാനെതിരായ സ്ക്വാഡില്‍ ഇടം പിടിച്ചത്. ഇതോടെ, രോഹിതിന് കീഴില്‍ തന്നെ ഇന്ത്യ ടി20 ലോകകപ്പും കളിക്കുമെന്നാണ് ആരാധകരുടെ പ്രതീക്ഷ.
ഏകദിന ലോകകപ്പ് തോല്‍വിക്ക് ശേഷം ലിമിറ്റഡ് ഓവറില്‍ രോഹിത് ശര്‍മ ഇന്ത്യന്‍ ടീമിലേക്ക് മടങ്ങിയെത്തുന്നു എന്ന പ്രത്യേകതയും ഇന്ന് അഫ്‌ഗാനിസ്ഥാനെതിരെ ആരംഭിക്കുന്ന പരമ്പരയ്‌ക്കുണ്ട്. അതുകൊണ്ട് തന്നെ ഏകദിന ലോകകപ്പിലെ പ്രകടനങ്ങള്‍ രോഹിതിന് ടി20യിലും ആവര്‍ത്തിക്കാനാകുമോ എന്നും ആരാധകര്‍ ഉറ്റുനോക്കുന്നു.
രോഹിതിന്‍റെ 'വൈറ്റ് ബോള്‍' പ്രകടനം : കഴിഞ്ഞ ഏകദിന ലോകകപ്പിലായിരുന്നു രോഹിത് ശര്‍മ ഇന്ത്യയ്‌ക്ക് വേണ്ടി അവസാനമായി വൈറ്റ് ബോള്‍ ക്രിക്കറ്റില്‍ കളിക്കാനിറങ്ങിയത്. ഇവിടെ മിന്നും പ്രകടനം തന്നെ രോഹിതിന് നടത്താന്‍ സാധിച്ചിട്ടുണ്ട്. ലോകകപ്പിലെ 11 മത്സരങ്ങളില്‍ നിന്നും 125.94 സ്‌ട്രൈക്ക് റേറ്റില്‍ 597 റണ്‍സായിരുന്നു രോഹിത് അടിച്ചെടുത്തത് (Rohit Sharma Recent ODI Stats).