രാജ്‌കോട്ട് : രഞ്ജി ട്രോഫി ക്രിക്കറ്റ് ടൂര്‍ണമെന്‍റില്‍ കേരളത്തിന് മിന്നുന്ന തുടക്കം. എലൈറ്റ് ഗ്രൂപ്പ് എയിലെ ആദ്യ മത്സരത്തില്‍ മേഘാലയയെ ഇന്നിങ്‌സിനും 166 റണ്‍സിനുമാണ് കേരളം തകര്‍ത്തെറിഞ്ഞത്.
ആദ്യം ബാറ്റ് ചെയ്ത മേഘാലയയുടെ ഇന്നിങ്സ് 148 റണ്‍സില്‍ അവസാനിച്ചിരുന്നു. മറുപടിക്കിറങ്ങിയ കേരളം ഒമ്പത് വിക്കറ്റ് നഷ്‌ടത്തില്‍ 505 റണ്‍സെടുത്ത് ഡിക്ലയര്‍ ചെയ്യുകയായിരുന്നു. തുടര്‍ന്ന് 357 റണ്‍സ് ഫോളോഓണ്‍ ചെയ്ത മേഘാലയ 191ന് പുറത്തായി.
നാല് വിക്കറ്റ് നേടിയ ബേസില്‍ തമ്പിയും മൂന്ന് വിക്കറ്റ് നേടിയ ജലജ്‌ സക്‌സേനയും ചേര്‍ന്നാണ് രണ്ടാം ഇന്നിങ്സില്‍ മേഘാലയയെ തകര്‍ത്തത്. ഏദന്‍ ആപ്പിള്‍ ടോം രണ്ടും മനു കൃഷ്ണന്‍ ഒരു വിക്കറ്റും വീഴ്‌ത്തി.
75 റണ്‍സ് നേടിയ സി.ജി ഖുറാനയാണ് മേഘാലയയുടെ ടോപ് സ്‌കോററര്‍. ദിപു 55 റണ്‍സുമായി പുറത്താവാതെ നിന്നു. ഏഴ് താരങ്ങള്‍ക്ക് രണ്ടക്കം കാണാന്‍ സാധിച്ചില്ല.