എഡ്‌ജ്‌ബാസ്റ്റണ്‍: ഇംഗ്ലണ്ടിനെതിരായ അഞ്ചാം ക്രിക്കറ്റ് ടെസ്റ്റിന്‍റെ ഒന്നാം ദിനം അവസാനിക്കുമ്പോൾ ഇന്ത്യ മികച്ച നിലയിൽ. ടോസ് നഷ്‌ടപ്പെട്ട് ബാറ്റിങ്ങിനിറങ്ങിയ ഇന്ത്യ ആദ്യ ദിനം കളി അവസാനിച്ചപ്പോൾ ഏഴ് വിക്കറ്റ് നഷ്‌ടത്തിൽ 338 റണ്‍സ് എന്ന നിലയിലാണ്. അതിവേഗ സെഞ്ച്വറി നേടിയ റിഷഭ് പന്തിന്‍റെയും (111 പന്തിൽ 146), അർധസെഞ്ച്വറി നേടിയ രവീന്ദ്ര ജഡേജയുടേയും ബാറ്റിങ് മികവാണ് ഇന്ത്യക്ക് കരുത്തായത്.
നിലവിൽ ജഡേജയും (83), മുഹമ്മദ് ഷമിയുമാണ് ക്രീസിൽ. ടോസ് നഷ്‌ടപ്പെട്ട് ബാറ്റിങ്ങിനിറങ്ങിയ ഇന്ത്യയെ ഇംഗ്ലീഷ് ബോളർമാർ എറിഞ്ഞൊതുക്കുകയായിരുന്നു. ശുഭ്‌മാൻ ഗിൽ (17), ചേതേശ്വർ പുജാര (13), ഹനുമാൻ വിഹാരി (20), വിരാട് കോലി (11), ശ്രയസ് അയ്യർ (15) എന്നിവർ പെട്ടന്ന് വീണതോടെ 98/5 എന്ന നിലയിൽ ഇന്ത്യ തകർച്ച മുന്നിൽക്കണ്ടു. എന്നാൽ പിന്നീട് ക്രിസീൽ ഒന്നിച്ച പന്ത്- ജഡേജ സഖ്യം തകർപ്പൻ ഷോട്ടുകളുടെ പിൻബലത്തിൽ ഇന്ത്യയുടെ സ്‌കോർ ഉയർത്തുകയായിരുന്നു.