വില്ലിങ്ടണ്‍ :അഫ്‌ഗാനിസ്ഥാനിൽ താലിബാൻ ഭരണം പിടിച്ചെടുത്തതോടെ പാകിസ്ഥാൻ പര്യടനത്തിനായി പോകുന്നതിൽ ആശങ്കയറിയിച്ച് ന്യൂസിലാൻഡ് ക്രിക്കറ്റ് ടീം അംഗങ്ങൾ. ബംഗ്ലാദേശ്, പാകിസ്ഥാൻ എന്നീ രാജ്യങ്ങളിലെ പര്യടനത്തിനായി തിങ്കളാഴ്‌ച പുറപ്പെടാനിരിക്കെയാണ് ഒരു വിഭാഗം ആശങ്കയറിയിച്ചത്.
സെപ്റ്റംബർ ഒന്ന് മുതൽ ധാക്കയിൽ ആരംഭിക്കുന്ന അഞ്ച് മത്സരങ്ങൾ ഉൾപ്പെടുന്ന ടി 20 പരമ്പരക്ക് ശേഷം ന്യൂസിലാൻഡ് ടീം പാക്കിസ്ഥാനിലേക്ക് പോകുമെന്നാണ് അറിയിച്ചിരുന്നത്. 18 വർഷങ്ങൾക്ക് ശേഷമാണ് ടീം പാകിസ്ഥാനില്‍ പര്യടനത്തിനൊരുങ്ങുന്നത്.
2002ൽ ന്യൂസിലാൻഡ് ടീമംഗങ്ങൾ താമസിച്ചിരുന്ന കറാച്ചിയിലെ ഹോട്ടലിന് പുറത്ത് ബോംബ് സ്ഫോടനം നടന്നിരുന്നു. തുടർന്ന് പര്യടനം വെട്ടിച്ചുരുക്കി അവർ നാട്ടിലേക്ക് മടങ്ങി.