ധാക്ക : ബാറ്റ്സ്മാന് ഫിന്‍ അലന് കൊവിഡ് സ്ഥിരീകരിച്ചതായി ന്യൂസിലൻഡ് ക്രിക്കറ്റ് ബോര്‍ഡ്. ബംഗ്ലാദേശ് പര്യടനത്തിനായി ധാക്കയിലെത്തി 48 മണിക്കൂറിനുള്ളിലാണ് യുവ വിക്കറ്റ് കീപ്പർ ബാറ്റ്സ്മാന് കൊവിഡ് സ്ഥിരീകരിച്ചത്.
രണ്ട് ഡോസ് കൊവിഡ് വാക്‌സിന്‍ സ്വീകരിച്ച താരം ഇംഗ്ലണ്ടിലെ ഹണ്ട്രഡ് ലീഗില്‍ ബർമിങ്ഹാം ഫീനിക്‌സിന് വേണ്ടി കളത്തിലിറങ്ങിയിരുന്നു. ഇംഗ്ലണ്ടില്‍ നിന്നും പുറപ്പെടുന്നതിന് മുമ്പ് കൊവിഡ് ടെസ്റ്റിനും താരം വിധേയനായിരുന്നു.
ചില ലക്ഷണങ്ങള്‍ അനുഭവപ്പെട്ടതിനെ തുടര്‍ന്ന് നടത്തിയ പരിശോധനയിലാണ് താരത്തിന് കൊവിഡ് സ്ഥിരീകരിച്ചതെന്ന് ന്യൂസിലൻഡ് ക്രിക്കറ്റ് ബോര്‍ഡ് അറിയിച്ചു. നിലവില്‍ ടീം താമസിക്കുന്ന ഹോട്ടലില്‍ ക്വാറന്‍റൈനിലാണ് താരം.
ചീഫ് മെഡിക്കല്‍ ഓഫിസറുമായി അലന് സമ്പര്‍ക്കമുണ്ട്. അതിനാല്‍ ബംഗ്ലാദേശ് ക്രിക്കറ്റ് ബോര്‍ഡിന്‍റെ ചീഫ് മെഡിക്കല്‍ ഓഫിസറുടെ ചികിത്സയിലാണ് താരമുള്ളത്.