മുംബൈ: പേസര്‍ ടി. നടരാജന് ഡെത്ത് ഓവര്‍ സ്പെഷ്യലിസ്റ്റാണെന്നും കഴിഞ്ഞ ടി20 ലോകകപ്പില്‍ താരത്തെ ടീമിന് നഷ്‌ടമായെന്നും മുന്‍ ഇന്ത്യൻ കോച്ച് രവിശാസ്‌ത്രി. പരിക്കിനെത്തുടര്‍ന്ന് ഏകദേശം ഒരുവര്‍ഷത്തെ ഇടവേളയ്‌ക്ക് ശേഷം താരം കളിക്കളത്തില്‍ തിരിച്ചെത്തിയതിന് പിന്നാലെയാണ് ശാസ്‌ത്രിയുടെ പ്രതികരണം.
''ഇംഗ്ലണ്ടിനെതിരായ ഏകദിന പരമ്പരയ്‌ക്ക് തയ്യാറെടുക്കുന്നതിനിടെയാണ് നടരാജന് പരിക്കേറ്റത്. ടി20 ലോകകപ്പില്‍ നടരാജനെ മിസ് ചെയ്‌തു. അവനൊരു ഡെത്ത് ഓവര്‍ സ്പെഷ്യലിസ്റ്റ് ബൗളറാണ്. വളരെ സമർത്ഥമായാണ് അവന്‍ യോർക്കറുകൾ എറിയുന്നത്. വളരെ നിയന്ത്രണത്തോടെയാണ് അവന്‍ ബൗള്‍ ചെയ്യുന്നത്.'' ശാസ്ത്രി പറഞ്ഞു. താരം വീണ്ടും കളിക്കാനിറങ്ങിയതില്‍ സന്തോഷമുണ്ടെന്നും ശാസ്ത്രി വ്യക്തമാക്കി.
കഴിഞ്ഞ വര്‍ഷം തുടക്കത്തില്‍ ഇംഗ്ലണ്ടിനെതിരായ ഇന്ത്യയുടെ ചരിത്രപരമായ പരമ്പര നേട്ടത്തില്‍ ശ്രദ്ധേയമായ പങ്ക് വഹിച്ച താരമാണ് ഇടങ്കയ്യന്‍ പേസറായ നടരാജന്. തുടര്‍ന്ന് ഏകദിന പരമ്പരയ്‌ക്കുള്ള തയ്യാറെടുപ്പിനിടെ കാല്‍മുട്ടിന് പരിക്കേറ്റതിനെ തുടര്‍ന്ന് വർഷത്തിന്‍റെ ഭൂരിഭാഗവും നഷ്‌ടമായിരുന്നു. എന്നാല്‍ ഐപിഎല്ലിലൂടെ താരം വീണ്ടും കളിക്കളത്തിലേക്ക് തിരിച്ചെത്തിയിരിക്കുകയാണ്.