ഏകദിന ക്രിക്കറ്റ് ലോകകപ്പിലെ (Cricket World Cup 2023) ഒന്നാം സെമി ഫൈനലില്‍ ന്യൂസിലന്‍ഡിനെ (India vs New Zealand) തകര്‍ത്ത്‌ ഫൈനല്‍ ടിക്കറ്റെടുത്തിരിക്കുകയാണ് ടീം ഇന്ത്യ. മുംബൈ വാങ്കഡെ സ്റ്റേഡിയത്തില്‍ നടന്ന മത്സരത്തില്‍ കിവീസിനെതിരെ 70 റണ്‍സിന്‍റെ ജയമാണ് ഇന്ത്യ സ്വന്തമാക്കിയത്. മത്സരത്തില്‍ ഇന്ത്യ ഉയര്‍ത്തിയ 398 റണ്‍സ് വിജയലക്ഷ്യം പിന്തുടര്‍ന്നിറങ്ങിയ ബ്ലാക്ക് ക്യാപ്‌സിന്‍റെ പോരാട്ടം 48.5 ഓവറില്‍ 327 റണ്‍സില്‍ അവസാനിക്കുകയായിരുന്നു.
മത്സരത്തില്‍ ഏഴ് വിക്കറ്റ് നേടിയ മുഹമ്മദ് ഷമിയാണ് (Mohammed Shami) ഇന്ത്യന്‍ ജയത്തില്‍ ഹീറോയയത്. ഇന്ത്യ ഉയര്‍ത്തിയ ഹിമാലയന്‍ വിജയലക്ഷ്യത്തിന് മുകളിലേക്ക് കിവീസ് അനായാസം തന്നെ പറന്നെത്തുമെന്ന് മത്സരത്തിന്‍റെ ഒരു ഘട്ടത്തില്‍ ഏവരും കരുതി. ആ സമയത്ത് പന്തെറിയാനെത്തി മത്സരത്തിന്‍റെ ഗതി മാറ്റിയെടുക്കാനും മുഹമ്മദ് ഷമിക്കായി (Mohammed Shami Game Changing Over Against New Zealand).
ഇന്ത്യ ഉയര്‍ത്തിയ വമ്പന്‍ വിജയലക്ഷ്യത്തിലേക്ക് ബാറ്റേന്തിയ കിവീസ് ജസ്‌പ്രീത് ബുംറയേയും മുഹമ്മദ് സിറാജിനെയും കരുതലോടെ നേരിട്ട് സ്കോറിങ് ഉയര്‍ത്തിയാണ് തുടങ്ങിയത്. ന്യൂസിലന്‍ഡ് ബാറ്റര്‍മാര്‍ നിലയുറപ്പിക്കുന്നത് തിരിച്ചറിഞ്ഞ നായകന്‍ മത്സരത്തിന്‍റെ അഞ്ചാം ഓവറില്‍ തന്നെ ഷമിക്ക് പന്തേല്‍പ്പിക്കുന്നു. തന്‍റെ സ്പെല്ലിലെ ആദ്യ ഓവറില്‍ തന്നെ ഡെവോണ്‍ കേണ്‍വെയെ (13) തിരികെ പവലിയനിലേക്ക് എത്തിക്കാന്‍ മുഹമ്മദ് ഷമിക്കായി.
ആദ്യ സ്പെല്ലിലെ രണ്ടാം ഓവറില്‍ രചിന്‍ രവീന്ദ്രയുടെ വിക്കറ്റും ഷമി സ്വന്തമാക്കി. ഇതോടെ ഇന്ത്യന്‍ ആരാധകര്‍ ഫൈനല്‍ സ്വപ്‌നം കണ്ടു. എന്നാല്‍, മൂന്നാം വിക്കറ്റില്‍ ഒന്നിച്ച കിവീസ് നായകന്‍ കെയ്‌ന്‍ വില്യംസണും ഡാരില്‍ മിച്ചലും ചേര്‍ന്ന് ഇന്ത്യന്‍ ബൗളര്‍മാര്‍ക്ക് മേല്‍ ആധിപത്യം സ്ഥാപിക്കുന്ന കാഴ്‌ചയ്‌ക്കാണ് പിന്നീട് വാങ്കഡെ സ്റ്റേഡിയം സാക്ഷിയായത്. സിറാജ്, ബുംറ, കുല്‍ദീപ്, ജഡേജ എന്നിവര്‍ക്കെതിരെയെല്ലാം കിവീസ് ബാറ്റര്‍മാര്‍ റണ്‍സ് കണ്ടെത്തി.
ഫീല്‍ഡിങ്ങിലും ഇന്ത്യന്‍ ടീമിന് പിഴവുകള്‍ സംഭവിച്ചു. ജസ്‌പ്രീത് ബുംറയുടെ ഓവറില്‍ കെയ്‌ന്‍ വില്യംസണെ പുറത്താക്കാനുള്ള അവസരം മുഹമ്മദ് ഷമി നിലത്തിട്ടതോടെ വാങ്കഡെയില്‍ ആര്‍ത്തിരമ്പിയ നീലക്കടല്‍ നിശബ്‌ദമായി. ഇന്ത്യ മത്സരം കൈവിടുമെന്ന് തോന്നിപ്പിച്ച നിമിഷങ്ങളായിരുന്നു അതെല്ലാം.