ദുബായ്: ഐപിഎല്ലില്‍ മികച്ച പ്രകടനം നടത്തുന്നുണ്ടെങ്കിലും ഓള്‍റൗണ്ടര്‍ സുനില്‍ നരെയ്നെ ടി20 ലോകകപ്പിനുള്ള വെസ്റ്റ്ഇന്‍ഡീസ് ടീമില്‍ ഉള്‍പ്പെടുത്തില്ലെന്ന് നായകന്‍ കീറോൺ പൊള്ളാർഡ്. ഐപിഎല്ലിലെ മികവിന്‍റെ അടിസ്ഥാനത്തിൽ താരത്തെ ടീമിലേക്ക് തിരിച്ചുവിളിച്ചേക്കുമെന്ന അഭ്യൂഹങ്ങള്‍ക്കിടെയാണ് വിന്‍ഡീസ് നായകന്‍റെ പ്രതികരണം.
'സുനിൽ നരെയ്നെ ടീമിൽ ഉൾപ്പെടുത്താത്തതുമായി ബന്ധപ്പെട്ട തന്‍റെ വാക്കുകള്‍ പലവഴിക്കും തിരിക്കും. നരെയ്‌ന്‍റെ പന്തുകൾ ഷാർജയിലെ പിച്ചിൽ തിരിയുന്നതു പോലെ തന്നെ. ഇപ്പോള്‍ നമുക്ക് ടീമിലുള്ള 15 താരങ്ങളെക്കുറിച്ച് ആലോചിക്കാം.
ഇത്തവണ അവരെ വച്ച് കിരീടം നിലനിർത്താനാകുമോ എന്നതാണ് പ്രധാനം. വിഷയവുമായി ബന്ധപ്പെട്ട് ആവശ്യത്തിലധികം പറഞ്ഞുകഴിഞ്ഞു. ഇതേക്കുറിച്ച് ഉത്തരവാദിത്തപ്പെട്ടവർ നേരത്തെ തന്നെ വിശദീകരിച്ചിട്ടുണ്ട്. വ്യക്തിപരമായി നരെയ്ൻ എന്‍റെ അടുത്ത സുഹൃത്താണ്.