ലഖ്‌നൗ:ഐപിഎല്‍ പതിനാറാം പതിപ്പിന്‍റെ തുടക്കം മുതലുള്ള പ്രധാന ചര്‍ച്ച വിഷയങ്ങളില്‍ ഒന്നാണ് ചെന്നൈ സൂപ്പര്‍ കിങ്‌സ് നായകന്‍ എംഎസ് ധോണിയുടെ വിരമിക്കല്‍. ഇക്കൊല്ലത്തോടെ ധോണി കളി മതിയാക്കുമെന്ന പ്രവചനങ്ങളുമായി നിരവധി പ്രമുഖരും രംഗത്തെത്തിയിരുന്നു. ഇതോടെ ആരാധകര്‍ക്കിടയിലും ആശങ്ക ഉയര്‍ന്നു.
ചെപ്പോക്കില്‍ ചെന്നൈയുടെ മത്സരങ്ങള്‍ കാണാനായി ആരാധകര്‍ ഒഴുകിയെത്തി. ചെന്നൈ മറ്റിടങ്ങളില്‍ കളിക്കാനെത്തിയാലും ഇത് തന്നെ അവസ്ഥ. ചെന്നൈ സൂപ്പര്‍ കിങ്‌സ് കളിക്കാനെത്തിയ മുംബൈ, ബാംഗ്ലൂര്‍, ജയ്‌പൂര്‍, കൊല്‍ക്കത്ത എന്നിവിടങ്ങളിലെ ഗാലറികളില്‍ തല' ധോണിയുടെ ആരാധകര്‍ നിറഞ്ഞു.
നേരത്തെ സണ്‍റൈസേഴ്‌സിനെതിരായ മത്സരത്തിന് പിന്നാലെ ധോണിയും വിരമിക്കല്‍ സൂചന നല്‍കിയിരുന്നു. കരിയറിന്‍റെ അവസാന ഘട്ടത്തിലാണ് താനെന്നും അത് കഴിയുന്നത്ര ആസ്വദിക്കാനാണ് ശ്രമിക്കുന്നതെന്നുമായിരുന്നു ധോണി അന്ന് പറഞ്ഞിരുന്നത്. എന്നാല്‍ അക്കാര്യത്തില്‍ ആരാധകര്‍ക്കിടയിലുണ്ടായ ആശങ്ക മാറ്റി ധോണി തന്നെ രംഗത്തെത്തിയിരിക്കുകയാണ്.
ലഖ്‌നൗ സൂപ്പര്‍ ജയന്‍റ്‌സിനെതിരായ മത്സരത്തിന് മുന്‍പാണ് വിരമിക്കലിനെ കുറിച്ചുള്ള എംഎസ് ധോണിയുടെ പ്രതികരണം. ടോസിനിടെ കമന്‍റേറ്റര്‍ ഡാനി മോറിസണിന്‍റെ ചോദ്യത്തിന് മറുപടി പറയുകയായിരുന്നു ധോണി.
ലഖ്‌നൗ സൂപ്പര്‍ ജയന്‍റ്‌സിനെതിരായ മത്സരത്തിന്‍റെ ടോസിന് പിന്നാലെ ' ഇപ്പോള്‍ ലഭിക്കുന്ന ആരാധകരുടെ പിന്തുണയും ഈ അവസാന സീസണും എങ്ങനെ ആസ്വദിക്കുന്നു' എന്നാണ് ഡാനി മോറിസണ്‍ എംഎസ്‌ഡിയോട് ചോദിച്ചത്. എന്നാല്‍ ഇത് കേട്ട് ചിരിച്ച ധോണി 'ഞാന്‍ അല്ലല്ലോ, നിങ്ങളെല്ലാവരുമല്ലേ ഇതെന്‍റെ അവസാന സീസണ്‍ എന്ന് തീരുമാനിച്ചത്' എന്നായിരുന്നു നല്‍കിയ മറുപടി.