പൂനെ: ഐപിഎല്ലില്‍ പഞ്ചാബ് കിംഗ്സിന് 154 റണ്‍സ് വിജയലക്ഷ്യം. ടോസ് നഷ്‌ടപ്പെട്ട് ആദ്യം ബാറ്റ് ചെയ്‌ത ലഖ്‌നൗ സൂപ്പര്‍ ജയന്‍റ്‌സ് നിശ്ചിത 20 ഓവറില്‍ 8 വിക്കറ്റ് നഷ്‌ടത്തില്‍ 153 റണ്‍സാണ് എടുത്തത്. അവസരത്തിനൊത്ത് ഉയര്‍ന്ന പഞ്ചാബ് ബൗളര്‍മാരുടെ പ്രകടനമാണ് കരുത്തുറ്റ ലഖ്‌നൗ ബാറ്റിംഗ് നിരയെ തളച്ചത്.
12.4 ഓവറില്‍ 98-2 എന്ന നിലയില്‍ നിന്നാണ് ലഖ്‌നൗ തകര്‍ന്നത്. ടോസ് നഷ്‌ടപ്പെട്ട് ആദ്യം ബാറ്റിംഗിനിറങ്ങിയ ലഖ്‌നൗവിന് മൂന്നാം ഓവറില്‍ തന്നെ നായകന്‍ കെ എല്‍ രാഹുലിനെ (11 പന്തില്‍ 6 റണ്‍സ്) നഷ്‌ടമായത് കനത്ത തിരിച്ചടിയായി. രണ്ടാം വിക്കറ്റില്‍ ഒത്ത് ചേര്‍ന്ന ക്വിന്‍റണ്‍ ഡി കോക്ക്, ദീപക് ഹൂഡ സഖ്യമാണ് സൂപ്പര്‍ ജയന്‍റ്‌സിനെ ഭേദപ്പെട്ട നിലയിലേക്ക് നയിച്ചത്.