ചെന്നൈ:ഐപിഎല്ലില്‍ സ്വപ്‌നതുല്യമായ കുതിപ്പാണ് ചെന്നൈ സൂപ്പര്‍ കിങ്സ് തുടരുന്നത്. തോല്‍വിയോടെ സീസണ്‍ തുടങ്ങിയ അവര്‍ പിന്നീടുള്ള അഞ്ച് മത്സരങ്ങളില്‍ നാലിലും ജയം പിടിച്ചു. രവീന്ദ്ര ജഡേജയും ഡെവോണ്‍ കോണ്‍വെയും തിളങ്ങിയ അവസാന മത്സരത്തില്‍ ചെപ്പോക്കില്‍ സണ്‍റൈസേഴ്‌സ് ഹൈദരാബാദിനെയാണ് ധോണിപ്പട വീഴ്‌ത്തിയത്.
ഈ ജയത്തോടെ അവര്‍ക്ക് എട്ട് പോയിന്‍റായി. നിലവില്‍ പോയിന്‍റ് പട്ടികയില്‍ മൂന്നാം സ്ഥാനത്താണ് ചെന്നൈ സൂപ്പര്‍ കിങ്സ്. ഹൈദരാബാദിനെതിരായ മത്സരത്തിന് പിന്നാലെ കമന്‍റേറ്റര്‍ ഹര്‍ഷ ഭോഗ്ലയുമായി ചെന്നൈ നായകന്‍ രസകരമായ ആശയവിനിമയം നടത്തിയിരുന്നു.
പലതരത്തിലുള്ള വിഷയങ്ങളാണ് ഇരുവരും സംസാരിച്ചത്. എന്നാല്‍, അതില്‍ ക്രിക്കറ്റ് ആരാധകര്‍ ഞെട്ടലോടെ കേട്ട ഒരു കാര്യമായിരുന്നു എംഎസ് ധോണി തന്‍റെ ഐപിഎല്‍ കരിയറിനെ കുറിച്ച് പറഞ്ഞത്. ധോണിയുടെ വിരമിക്കലിനെ ചുറ്റിപ്പറ്റിയുള്ള ചര്‍ച്ചകള്‍ സജീവമായി തുടരുന്നതിനിടെയായിരുന്നു ഇതില്‍ പ്രതികരണവുമായി ചെന്നൈ നായകന്‍ തന്നെ രംഗത്തെത്തിയത്.
'ഇത് എന്‍റെ കരിയറിന്‍റെ അവസാനഘട്ടമാണ്. അത് എത്രത്തോളം ആസ്വാദ്യകരമാക്കാന്‍ കഴിയുമൊ അതാണ് പ്രധാനം. ചെന്നൈ ഞങ്ങള്‍ക്ക് ഒരുപാട് സ്‌നേഹവും പിന്തുണയും നല്‍കി' -ധോണി പറഞ്ഞു.
നേരത്തെ ധോണി ഈ ഐപിഎല്‍ സീസണോടെ വിരമിക്കല്‍ പ്രഖ്യാപനം നടത്തുമെന്ന് ചെന്നൈ സൂപ്പര്‍ കിങ്സ് മുന്‍ താരം കേദാര്‍ ജാദവ് പറഞ്ഞിരുന്നു. എന്നാല്‍ വരുന്ന സീസണിലും ധോണി ടീമിനൊപ്പം കളിക്കുമെന്നാണ് സിഎസ്കെ താരം മൊയീന്‍ അലി അഭിപ്രായപ്പെട്ടത്. ഇതിന് പിന്നാലെയാണ് വിരമിക്കല്‍ സൂചന നല്‍കി 'തല'ധോണി തന്നെ രംഗത്തെത്തിയിരിക്കുന്നത്.