മുംബൈ : ഇന്ത്യൻ പ്രീമിയർ ലീഗിൽ ലഖ്‌നൗ സൂപ്പര്‍ ജയന്‍റ്‌സിനെതിരെ ചെന്നൈ സൂപ്പർ കിങ്സിന് ബാറ്റിങ്. ടോസ് നേടിയ ലഖ്‌നൗ നായകൻ കെഎൽ രാഹുൽ ബോളിങ് തെരഞ്ഞെടുക്കുകയായിരുന്നു. കഴിഞ്ഞ മത്സരത്തിൽ നിന്ന് വ്യത്യസ്‌തമായി മൊഹ്‌സിൻ ഖാന് പകരം ആൻഡ്രൂ ടൈയെ ലഖ്‌നൗ ടീമിൽ ഉൾപ്പെടുത്തിയപ്പോൾ ഡെവോണ്‍ കോണ്‍വെ, മിച്ചൽ സാന്‍റ്നർ, ആദം മിൽനെ എന്നിവർക്ക് പകരം മൊയിന്‍ അലി, മുകേഷ്‌ ചൗധരി, ഡ്വയ്‌ൻ പ്രിറ്റോറിയസ് എന്നിവരെ ചെന്നൈയും ഉൾപ്പെടുത്തി.
ആദ്യ മത്സരത്തിലേറ്റ തോൽവിയുടെ ക്ഷീണം മാറ്റാൻ ജയം ലക്ഷ്യമിട്ടാണ് ഇരു ടീമുകളും ഇന്ന് മത്സരത്തിനിറങ്ങുന്നത്. കൊല്‍ക്കത്തയോട് തോറ്റാണ് ചെന്നൈ വരുന്നതെങ്കില്‍ കന്നിക്കാരായ ഗുജറാത്ത് ടൈറ്റന്‍സിന് മുന്നിലാണ് ലഖ്‌നൗ വീണത്. അതിനാൽ തന്നെ ഇരുവർക്കും ഇന്നത്തെ ജയം അനിവാര്യമാണ്.
ടോപ്പ് ഓർഡർ ഫോമിലെത്താത്തതാണ് ആദ്യത്തെ മത്സരത്തിൽ രണ്ട് ടീമുകൾക്കും തിരിച്ചടിയായത്. ചെന്നൈ നിരയിൽ ക്യാപ്റ്റന്‍റെ സമ്മര്‍ദമില്ലാതെ ബാറ്റ് വീശുന്ന ധോണിയും, റോബിൻ ഉത്തപ്പയും ഫോമിലേക്കുയർന്നത് ആശ്വാസമാണ്. ബൗളിങ്ങിൽ ഡ്വയ്‌ൻ ബ്രാവോ മികച്ച ഫോമിലാണ്. രവീന്ദ്ര ജഡേജ, മൊയിന്‍ അലി എന്നിവർ കൂടി ചേരുമ്പോൾ സ്‌പിൻ നിര ശക്‌തമാകും.