ദുബായ്‌ :ഐപിഎല്ലിൽ ഇന്ന് രണ്ട് മത്സരങ്ങൾ. ആദ്യ മത്സരത്തിൽ കരുത്തരായ ഡൽഹി ക്യാപിറ്റൽസ് മുംബൈ ഇന്ത്യൻസിനെ നേരിടുമ്പോൾ രണ്ടാം മത്സരത്തിൽ ചെന്നൈ സൂപ്പർ കിങ്സ് രാജസ്ഥാൻ റോയൽസിനെ നേരിടും. ഡഹിയും ചെന്നൈയും പ്ലേ ഓഫ് ഉറപ്പിച്ചിട്ടുണ്ട്. എന്നാൽ മുംബൈക്കും രാജസ്ഥാനും ഇന്ന് ജീവൻ മരണ പോരാട്ടമാണ്.
പ്ലേ ഓഫിൽ പ്രവേശിച്ചതിനാൽ ഡൽഹിയെ സംബന്ധിച്ചിടത്തോളം ഇന്നത്തെ മത്സരം നിർണായകമല്ല. 11 മത്സരങ്ങളിൽ നിന്ന് 16 പോയിന്‍റുള്ള ടീം പോയിന്‍റ് പട്ടികയിൽ രണ്ടാം സ്ഥാനത്താണ്. എന്നിരുന്നാലും മത്സരം വിജയിച്ച് പോയിന്‍റ് പട്ടികയിൽ ഒന്നാം സ്ഥാനത്തെത്താനാകും ഡൽഹി ശ്രമിക്കുക. മികച്ച ഫോമിലാണ് ടീമിന്‍റെ ബാറ്റിങ് ബോളിങ് നിരകള്‍.
എന്നാൽ മുംബൈയുടെ കാര്യം തീർത്തും വ്യത്യസ്തമാണ്. 11 മത്സരങ്ങളിൽ നിന്ന് 10 പോയിന്‍റുമായി ആറാം സ്ഥാനത്തുള്ള മുംബൈക്ക് പ്ലേ ഓഫിൽ കടക്കാൻ ഇന്നത്തെ മത്സരം ഏറെ നിർണായകമാണ്. തുടർ തോൽവികൾക്ക് ശേഷം വിജയത്തിലേക്ക് തിരിച്ചെത്തിയെങ്കിലും മുംബൈക്ക് ഇന്നത്തെ മത്സരം കടുപ്പമേറിയതായിരിക്കും.
ആദ്യ പാദത്തിൽ ഇരുടീമുകളും തമ്മിൽ ഏറ്റുമുട്ടിയപ്പോൾ വിജയം ഡൽഹിക്കൊപ്പമായിരുന്നു. ഇതുവരെ ഏറ്റുമുട്ടിയ 29 മത്സരങ്ങളിൽ 16 എണ്ണം മുംബൈ ജയിച്ചപ്പോൾ 13 തവണ ഡൽഹി വിജയിച്ചു.