ദുബായ്‌ :ഐപിഎല്ലിൽ ഇന്ന് രണ്ട് മത്സരങ്ങൾ. ആദ്യ മത്സരത്തിൽ കൊൽക്കത്ത നൈറ്റ് റൈഡേഴ്‌സ് ഡൽഹി ക്യാപ്പിറ്റൽസിനെ നേരിടുമ്പോൾ രണ്ടാം മത്സരത്തിൽ മുംബൈ ഇന്ത്യൻസ് പഞ്ചാബ് കിങ്സിനെ നേരിടും. ഷാർജ ക്രിക്കറ്റ് സ്റ്റേഡിയത്തിൽ വൈകുന്നേരം 3.30ന് തുടങ്ങുന്ന മത്സരത്തില്‍ വിജയിച്ച് ഒന്നാം സ്ഥാനത്തേക്ക് കുതിക്കാൻ ഡൽഹി ഇറങ്ങുമ്പോൾ വിജയിച്ച് പ്ലേ ഓഫ് സാധ്യതകൾ നിലനിർത്താനാകും കൊൽക്കത്ത ഇന്നിറങ്ങുക.
പത്ത് മത്സരങ്ങളിൽ നിന്ന് എട്ട് വിജയമുൾപ്പെടെ 16 പോയിന്‍റുമായി ഡൽഹി പട്ടികയിൽ രണ്ടാം സ്ഥാനത്താണ്. പത്ത് മത്സരങ്ങളിൽ നിന്ന് നാല് വിജയങ്ങളുമായി കൊൽക്കത്ത നാലാം സ്ഥാനത്തും. ആദ്യ ഘട്ടത്തിൽ ഇരു ടീമുകളും ഏറ്റുമുട്ടിയപ്പോൾ വിജയം ഡൽഹിക്കൊപ്പമായിരുന്നു. ഇതുവരെ 27 മത്സരങ്ങളിൽ ഇരു ടീമുകളും നേർക്കുനേർ വന്നപ്പോൾ 14 തവണ വിജയം കൊൽക്കത്തക്കൊപ്പമായിരുന്നു.
രണ്ടാം പാദത്തിൽ ഇരു ടീമുകളും മികച്ച ഫോമിലാണ് കളിക്കുന്നത്. മികച്ച ബൗളിങ്ങാണ് ഇരുടീമുകളുടേയും ശക്തി. കൊൽക്കത്ത നിരയിൽ പരിക്കേറ്റ കുൽദീപ് യാദവ് നാട്ടിലേക്ക് മടങ്ങിയിരുന്നു. കഴിഞ്ഞ മത്സരത്തിനിടെ പരിക്കേറ്റ ആന്ദ്രേ റസലും ഇന്നത്തെ മത്സരത്തിൽ കളിക്കാൻ സാധ്യതയില്ല.
ബാറ്റിങ് നിരയിൽ വെങ്കിടേഷ് അയ്യർ മികച്ച ഫോമിൽ കളിക്കുന്നതും ടീമിന്‍റെ ആത്മവിശ്വാസം വർധിപ്പിക്കുന്നു. ശുഭ്‌മാന്‍ ഗില്ലും നിതീഷ് റാണയും ഫോമിലേക്ക് ഉയർന്നതും ടീമിന് ഗുണം ചെയ്യും.