അബുദാബി :ഐപിഎല്ലിൽ മുംബൈ ഇന്ത്യൻസിനെതിരെ ടോസ് നേടിയ കൊൽക്കത്ത നൈറ്റ് റൈഡേഴ്‌സ് ഫീൽഡിങ് തെരഞ്ഞെടുത്തു. കഴിഞ്ഞ മത്സരത്തിലെ അതേ ടീമിനെ കൊൽക്കത്ത നിലനിർത്തിയപ്പോൾ മുംബൈയിൽ ക്യാപ്റ്റൻ രോഹിത് ശർമ തിരിച്ചെത്തി. ഹർദിക് പാണ്ഡ്യ ഇന്നും മുംബൈ നിരയിലില്ല.
കൊൽക്കത്ത ആദ്യ മത്സരത്തിൽ ബാംഗ്ലൂരിനെ തകർത്തെറിഞ്ഞ ആത്മവിശ്വാസത്തോടെയാണ് കളിക്കാനെത്തുന്നതെങ്കിൽ ചെന്നൈയോട് ആദ്യമത്സരം തോറ്റതിന്‍റെ നാണക്കേട് മാറ്റാനാണ് മുംബൈ ഇന്ന് കളത്തിലിറങ്ങുന്നത്. വ്യാഴാഴ്‌ചത്തെ മത്സരം ഇരുടീമുകൾക്കും നിർണായകമാണ്.
നിലവിൽ പോയിന്‍റ് പട്ടികയിൽ നാലാം സ്ഥാനത്താണ് മുംബൈ. എട്ട് കളികളിൽ നിന്ന് നാല് വിജയവും നാല് തോൽവിയുമുൾപ്പടെ എട്ട് പോയിന്‍റാണ് ടീമിനുള്ളത്. എട്ട് കളികളിൽ നിന്ന് മൂന്ന് വിജയവും അഞ്ച് തോൽവിയുമുൾപ്പടെ ആറ് പോയിന്‍റുമായി ആറാം സ്ഥാനത്താണ് കൊൽക്കത്ത. ആദ്യ പാദത്തിൽ ഇരുടീമുകളും ഏറ്റുമുട്ടിയപ്പോൾ വിജയം മുംബൈക്കൊപ്പമായിരുന്നു.