ലണ്ടൻ : ഐപിഎല്‍ രണ്ടാം പാദ മത്സരങ്ങള്‍ക്കായി മുംബൈ ഇന്ത്യൻസ് താരങ്ങള്‍ അബുദാബിയിലെത്തി. ക്യാപ്റ്റന്‍ രോഹിത് ശര്‍മ, പേസ് ബൗളര്‍ ജസ്പ്രീത് ബുംറ, സൂര്യകുമാര്‍ യാദവ് എന്നിവര്‍ കുടുംബസമേതം ചാര്‍ട്ടേഡ് വിമാനത്തിലാണ് അബുദാബിയിലെത്തിയത്. ഇംഗ്ലണ്ടിനെതിരെ നടന്ന ടെസ്റ്റ് പരമ്പരയ്ക്കായി മാഞ്ചസ്റ്ററിലായിരുന്നു താരങ്ങൾ.
വിമാനം കയറും മുൻപും ശേഷവും നടന്ന പരിശോധനയില്‍ താരങ്ങൾ കൊവിഡ് നെഗറ്റീവാണെന്ന് മുംബൈ ഇന്ത്യന്‍സ് അധികൃതര്‍ അറിയിച്ചു. ടീമിന്‍റെ ബയോ ബബിളില്‍ ചേരും മുമ്പ് കൊവിഡ് മാനദണ്ഡം പാലിച്ച്‌ താരങ്ങൾ ആറ് ദിവസം ക്വാറന്‍റൈനില്‍ പോകും.
ഐപിഎല്ലില്‍ പങ്കെടുക്കാനായി താരങ്ങള്‍ക്ക് വിമാനങ്ങള്‍ ഏര്‍പ്പാടാക്കില്ലെന്ന് ബിസിസിഐ വ്യക്തമാക്കിയതിനെ തുടർന്നാണ് താരങ്ങൾക്കായി ഫ്രാഞ്ചൈസികൾ ചാർട്ടേഡ് വിമാനം സജ്ജമാക്കിയത്. റോയല്‍ ചലഞ്ചേഴ്‌സ് ബാംഗ്ലൂര്‍ ക്യാപ്റ്റൻ വിരാട് കോലിക്കും, പേസര്‍ മുഹമ്മദ് സിറാജിനും ടീം ചാർട്ടേഡ് വിമാനം ഒരുക്കിയിരുന്നു. ചെന്നൈ സൂപ്പർ കിങ്സും താരങ്ങളെ എത്തിക്കാൻ വിമാനം ഒരുക്കുമെന്നാണ് വിവരം.