ദുബായ്: കൊല്‍ക്കത്തക്ക് എതിരായ ക്യാച്ചിലൂടെ കയ്യടി നേടിയ മലയാളി താരം സഞ്ജു സാംസണ്‍ ഐപിഎല്ലിലെ സെന്‍സേഷനായി മാറുകയാണ്. ക്യാച്ച് സ്വന്തമാക്കിയെങ്കിലും ഗ്രൗണ്ടില്‍ മലര്‍ന്നടിച്ച് വീണ സഞ്ജു അല്‍പ്പനേരം അവിടെ ഇരുന്ന ശേഷമാണ് വീണ്ടും കളിയില്‍ സജീവമായത്. ഓസിസ് പേസര്‍ പാറ്റ് കമ്മിന്‍സിന്‍റെ വിക്കറ്റാണ് രാജസ്ഥാന് വേണ്ടി സഞ്ജു സ്വന്തമാക്കിയത്. സഞ്ജുവിന്‍റെ ആ അനുഭവത്തെ തന്‍റെ ഫീല്‍ഡിലെ അനുഭവവുമായാണ് സച്ചിന്‍ താരതമ്യപ്പെടുത്തിയത്.
സഞ്ജു സാംസണ്‍ വക ഉജ്വലമായ ഒരു ക്യാച്ച്. ഇത്തരത്തില്‍ തല പിന്നില്‍ പോയി ഇടിക്കുമ്പോള്‍ എന്തുമാത്രം വേദനിക്കുമെന്ന് എനിക്കറിയാം. 1992ല്‍ വെസ്റ്റ്ഇന്‍ഡീസിന് എതിരായ മത്സരത്തില്‍ ഇത്തരമൊരു ക്യാച്ച് എടുത്തപ്പോള്‍ ഇതേ വേദന ഞാനും അനുഭവിച്ചതാണ്. സച്ചിന്‍ ട്വീറ്റ് ചെയ്‌തു. ഇതുമായി ബന്ധപ്പെട്ട് ആരാധകന്‍ പങ്കുവെച്ച ദൃശ്യങ്ങളും സച്ചിന്‍ ട്വീറ്റില്‍ ഉള്‍പ്പെടുത്തി.
സീസണില്‍ രണ്ടാമത്തെ തവണയാണ് സച്ചിന്‍ സഞ്ജുവിനെ പരാമര്‍ശിച്ച് ട്വീറ്റ് ചെയ്യുന്നത്. നേരത്തെ ചെന്നൈക്ക് എതിരെ അര്‍ദ്ധസെഞ്ച്വറിയോടെ 72 റണ്‍സെടുത്തപ്പോഴായിരുന്നു സച്ചിന്‍റെ ട്വീറ്റ്.