ഇന്ത്യന്‍ പ്രീമിയര്‍ ലീഗില്‍ ഇന്ന് ഡല്‍ഹി കാപിറ്റല്‍സ് - ചെന്നൈ സൂപ്പർ കിംഗ്സിനെ നേരിടും. ആദ്യ മത്സരത്തിൽ ജയിച്ച ഇരുടീമും രണ്ടാം മത്സരത്തിലും ജയിച്ച് ഫോം നിലനിർത്താമെന്ന പ്രതീക്ഷയിലാണ്. ഡല്‍ഹിയുടെ ഹോം ഗ്രൗണ്ടായ ഫിറോസ് ഷാ കോട്‌ലയിൽ രാത്രി എട്ട് മണിക്കാണ് മത്സരം.
കരുത്തരായ മുംബൈ ഇന്ത്യൻസിനെ അവരുടെ തട്ടകത്തിൽ തകർത്ത ആത്മവിശ്വാസവുമായാണ് ഡൽഹി ചെന്നൈക്കെതിരെ ഇറങ്ങുന്നത്. യുവതാരങ്ങളാണ് ഡൽഹിയുടെ കരുത്ത്. കഴിഞ്ഞ മത്സരത്തിൽ മുംബൈ ബൗളർമാരെ കണക്കിന് പ്രഹരിച്ച റിഷഭ് പന്ത് തന്നെയാകും ഇന്നത്തെ ശ്രദ്ധാകേന്ദ്രം. 27 പന്തില്‍ പുറത്താവാതെ 78 റണ്‍സെടുത്ത പന്തിനെ ധോണി എങ്ങനെ നേരിടുമെന്നതും ഇന്നത്തെ മത്സരത്തില്‍ ഏവരും ഉറ്റുനോക്കുന്നതാണ്. നായകൻ ശ്രേയസ് അയ്യര്‍, പൃഥ്വി ഷാ, ശിഖര്‍ ധവാന്‍ എന്നിവരുൾപ്പെടുന്ന ഡൽഹി, മുംബൈക്കെതിരെ വാംഖഡേയില്‍ നേടിയത് 213 എന്ന കൂറ്റൻ സ്കോറാണ്. മുംബൈക്കെതിരെ എല്ലാ മേഖലയിലും മികച്ച പ്രകടനം കാഴ്ച്ചവച്ചടീം ഇന്നും മികവ് തുടരുമെന്നാണ് ആരാധകരുടെ പ്രതീക്ഷ.