ധാക്ക: ബംഗ്ലാദേശിനെതിരായ ആദ്യ ടെസ്റ്റില്‍ മൂന്ന് വിക്കറ്റിന്‍റെ ജയം സ്വന്തമാക്കി വെസ്റ്റ് ഇന്‍ഡീസ്. ബംഗ്ലാദേശ് ഉയര്‍ത്തിയ 395 റണ്‍സെന്ന വിജയ ലക്ഷ്യം പിന്തുടര്‍ന്ന് രണ്ടാം ഇന്നിങ്സില്‍ മറുപടി ബാറ്റിങ് ആരംഭിച്ച സന്ദര്‍ശകര്‍ അരങ്ങേറ്റക്കാരന്‍ കെയില്‍ മയേഴ്‌സിന്‍റെ കരുത്തിലാണ് ജയം സ്വന്തമാക്കിയത്.
ഇരട്ടസെഞ്ച്വറിയോടെ 210 റണ്‍സെടുത്ത മയേഴ്‌സ് പുറത്താകാതെ നിന്നു. 20 ബൗണ്ടറിയും ഏഴ്‌ സിക്‌സും ഉള്‍പ്പെടുന്നതായിരുന്നു മയേഴ്‌സിന്‍റെ വമ്പന്‍ ഇന്നിങ്സ്. അരങ്ങേറ്റ ടെസ്റ്റില്‍ ഇരട്ട സെഞ്ച്വറി സ്വന്തമാക്കുന്ന ആറാമത്തെ ബാറ്റ്‌സ്‌മാനാണ് മയേഴ്‌സ്. ടെസ്റ്റ് ക്രിക്കറ്റിന്‍റെ ചരിത്രത്തില്‍ അവസാന ദിവസം വമ്പന്‍ സ്‌കോര്‍ പിന്തുടരുമ്പോള്‍ മയേഴ്‌സ് പുറത്തെടുത്ത കരുത്തുറ്റ ഇന്നിങ്സ് ക്രിക്കറ്റ് ചരിത്രത്തില്‍ രേഖപ്പെടുത്തുമെന്നാണ് നിരീക്ഷകരുടെ വിലയിരുത്തല്‍.