ചെന്നൈ:ഇംഗ്ലണ്ടിനെതിരെ ടീം ഇന്ത്യ ഫോളോ ഓണ്‍ ഭീഷണിയില്‍. ചെന്നൈയില്‍ ഇംഗ്ലണ്ട് ഉയര്‍ത്തിയ ഒന്നാം ഇന്നിങ്സ് സ്‌കോറായ 578 റണ്‍സ് പിന്തുടര്‍ന്ന് മറുപടി ബാറ്റിങ് ആരംഭിച്ച ഇന്ത്യക്ക് മൂന്നാം ദിവസം കളി നിര്‍ത്തുമ്പോള്‍ ആറ് വിക്കറ്റ് നഷ്‌ടത്തില്‍ 257 റണ്‍സെടുക്കാനെ സാധിച്ചുള്ളൂ. 33 റണ്‍സെടുത്ത ഓള്‍റൗണ്ടര്‍ വാഷിങ്‌ടണ്‍ സുന്ദറും എട്ട് റണ്‍സെടുത്ത ആര്‍ അശ്വിനുമാണ് ക്രീസില്‍.
ഒരു ഘട്ടത്തില്‍ നാല് വിക്കറ്റ് നഷ്‌ടത്തില്‍ 73 റണ്‍സെന്ന നിലയില്‍ പ്രതിസന്ധിയിലായ ടീം ഇന്ത്യയെ അര്‍ദ്ധസെഞ്ച്വറിയോടെ 73 റണ്‍സെടുത്ത ചേതേശ്വര്‍ പൂജാരയും 91 റണ്‍സെടുത്ത റിഷഭ് പന്തും ചേര്‍ന്നാണ് കരകയറ്റിയത്. അഞ്ചാം വിക്കറ്റ് കൂട്ടുകെട്ടില്‍ 119 റണ്‍സാണ് ഇരുവരും ചേര്‍ന്ന് സ്‌കോര്‍ബോഡില്‍ കൂട്ടിച്ചേര്‍ത്തത്. ഇംഗ്ലീഷ് സ്‌പിന്നര്‍ ഡോം ബെസാണ് ഇന്ത്യന്‍ ഇന്നിങ്സിലെ ഏറ്റവും വലിയ കൂട്ടുകെട്ട് പോളിച്ചത്. ബെസിന്‍റെ പന്തില്‍ ബേണ്‍സിന് ക്യാച്ച് വഴങ്ങിയാണ് പൂജാര പവലിയനിലേക്ക് മടങ്ങിയത്.