കാബൂള്‍ : വനിത ക്രിക്കറ്റിനെ പിന്തുണയ്‌ക്കാത്ത അഫ്ഗാനിസ്ഥാനെതിരായ ടി20 ലോകകപ്പ് മത്സരങ്ങള്‍ ബഹിഷ്കരിക്കുമെന്ന ഓസ്ട്രേലിയയുടെ ടെസ്റ്റ് ക്യാപ്റ്റൻ ടിം പെയ്നിന്റെ പരാമർശത്തിനെതിരെ അസ്‌ഗർ സ്റ്റാനിക്‌സായ്‌.
ടി20 ലോക കപ്പില്‍ മാത്രമല്ല, ഐസിസി സംഘടിപ്പിക്കുന്ന എല്ലാ തരം ഫോര്‍മാറ്റിലുള്ള മത്സരങ്ങളിലും കളിക്കാന്‍ അഫ്ഗാന് നിയമപരമായി സാധിക്കുമെന്നും, ഇത്തരം ടൂര്‍ണമെന്‍റുകളില്‍ രാജ്യത്തിന്‍റെ ധീരരായ താരങ്ങള്‍ അവരുടെ മികച്ച പ്രകടനം കാഴ്‌ചവെക്കുമെന്ന് ഉറപ്പാണെന്നും അസ്‌ഗർ പറഞ്ഞു.
ഫേസ്ബുക്ക് കുറിപ്പിലൂടെയാണ് അസ്‌ഗർ ഇക്കാര്യം വ്യക്തമാക്കിയത്. ''ക്രിക്കറ്റിന്‍റെ ഈ നിലയിലെത്താന്‍ വളരെയധികം കഠിനാധ്വാനവും അർപ്പണബോധവും ആവശ്യമാണെന്ന് ഒരു കായിക താരമെന്ന നിലയിലും പ്രൊഫഷണൽ ക്രിക്കറ്റര്‍ എന്ന നിലയിലും നിങ്ങള്‍ക്കറിയാം.
അഫ്‌ഗാനെപ്പോലെ ക്രിക്കറ്റിന് അധികം പ്രിവിലേജും അടിസ്ഥാന സൗകര്യങ്ങളുമില്ലാത്ത ഒരു രാജ്യം, ലോകത്തിലെ മികച്ച 10 ക്രിക്കറ്റ് ടീമുകളുമായി തോളോട് തോള്‍ ചേര്‍ന്ന് നില്‍ക്കുന്നുണ്ടെങ്കില്‍ അതിന് അടങ്ങാത്ത നിശ്ചയദാർഡ്യവും, അഭിനിവേശവും, കഴിവും ആവശ്യമാണ്. അതിനാൽ, അഫ്ഗാൻ ക്രിക്കറ്റിനെ ഒറ്റപ്പെടുത്തുന്നതിന് കാരണമാകുന്ന ആക്രമണാത്മക പ്രസ്താവനകളില്‍ നിന്നും നിങ്ങൾ വിട്ടുനിൽക്കണം'' അസ്‌ഗർ കുറിച്ചു.