മെല്‍ബണ്‍:പുതുവത്സരാഘോഷ വിവാദത്തില്‍ അകപ്പെട്ട ഇന്ത്യന്‍ ക്രിക്കറ്റ് ടീമിന് ആശ്വാസം. ഓസ്‌ട്രേലിയക്കെതിരായ സിഡ്‌നി ടെസ്റ്റിന് മുന്നോടിയായി നടന്ന കൊവിഡ് പരിശോധനയില്‍ ഇന്ത്യന്‍ താരങ്ങളും സപ്പോര്‍ട്ടിങ് സ്റ്റാഫുമെല്ലാം നെഗറ്റീവ്. ഈ മാസം മൂന്നിന് നടത്തിയ ആര്‍ടി പിസിആര്‍ പരിശോധനയിലാണ് പരിശോധനാ ഫലം നെഗറ്റീവായതെന്ന് ബിസിസിഐ വ്യക്തമാക്കി.
ഇന്ത്യന്‍ ഉപനായകന്‍ രോഹിത് ശര്‍മ, ശുഭ്‌മാന്‍ ഗില്‍, റിഷഭ് പന്ത്, നവ്ദീപ് സെയ്‌നി, പൃഥ്വി ഷാ എന്നിവര്‍ പുതുവത്സരാഘോഷത്തോടനുബന്ധിച്ച് ഭോജനശാലയില്‍ ഒത്തുകൂടിയ ദൃശ്യം സാമൂഹ്യമാധ്യമത്തില്‍ വ്യാപിച്ചിരുന്നു. ഇന്ത്യന്‍ ആരാധകന്‍ ഇതുസംബന്ധിച്ച ദൃശ്യങ്ങള്‍ പുറത്ത് വിട്ടതോടെ സംഭവം വിവാദമാവുകയും ചെയ്‌തു. താരങ്ങള്‍ കൊവിഡ് മാനദണ്ഡങ്ങള്‍ ലംഘിച്ചെന്ന ആരോപണമാണുയര്‍ന്നത്. സംഭവത്തില്‍ ക്രിക്കറ്റ് ഓസ്‌ട്രേലിയയും ബിസിസിഐയും നടത്തുന്ന അന്വേഷണം പുരോഗമിക്കുകയാണ്. കൊവിഡ് മാനദണ്ഡങ്ങള്‍ ലംഘിച്ചെന്ന ആരോപണത്തെ തുടര്‍ന്ന് താരങ്ങള്‍ ഐസൊലേഷനിലാണ്.