കൊളംബോ : ശ്രീലങ്കക്കെതിരായ രണ്ടാം ടി 20യിൽ ഇന്ത്യക്ക് ബാറ്റിങ് തകർച്ച. ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഇന്ത്യ 20 ഓവറിൽ അഞ്ച് വിക്കറ്റ് നഷ്ടത്തിൽ 132 റണ്‍സ് നേടി.
ഇന്ത്യൻ നിരയിൽ ക്യാപ്റ്റൻ ശിഖർ ധവാൻ മാത്രമാണ് ഭേദപ്പെട്ട പ്രകടനം കാഴ്ചവച്ചത്. അരങ്ങേറ്റ മത്സരത്തിനിറങ്ങിയ റിതുരാജ് ഗെയ്ക്‌വാദിന്‍റെ വിക്കറ്റാണ് ഇന്ത്യക്ക് ആദ്യം നഷ്ടമായത്.
18 പന്തില്‍ 21 റണ്‍സ് നേടിയ റിതുരാജിനെ ദസുന്‍ ഷനക മിനോദ് ബനൂക്കയുടെ കൈകളിലെത്തിക്കുകയായിരുന്നു. ഏഴ് ഓവറില്‍ 49 റണ്‍സ് കൂട്ടുകെട്ടുണ്ടാക്കിയാണ് ഓപ്പണിങ് സഖ്യം പിരിഞ്ഞത്.
ഒരു വശത്ത് മികച്ച ഫോമിൽ കളിക്കുകയായിരുന്ന ധവാനെ അഖില ധനഞ്ജയ ബൗൾഡ് ആക്കി. 42 പന്തുകളിൽ നിന്ന് അഞ്ച് ഫോറുകളുൾപ്പെടെ 40 റണ്‍സായിരുന്നു ധവാൻ നേടിയത്.