ന്യൂഡല്‍ഹി : ദക്ഷിണാഫ്രിക്കയ്‌ക്കെതിരെ സെഞ്ചൂറിയനില്‍ മികച്ച തുടക്കം ലഭിച്ചങ്കിലും അനാവശ്യ ഷോട്ടിന് ശ്രമിച്ചാണ് ഇന്ത്യന്‍ ക്യാപ്റ്റന്‍ വിരാട് കോലി പുറത്തായത്. 94 പന്തില്‍ 35 റണ്‍സാണ് താരത്തിന് നേടാനായത്. എന്‍ഗിഡിയുടെ പന്തില്‍ എഡ്‌ജായി സ്ലിപ്പില്‍ വിയാന്‍ മുള്‍ഡറുടെ കൈകളിലാണ് കോലി അവസാനിച്ചത്.
ഓഫ് സ്റ്റംപില്‍ നിന്നും വൈഡായി പുറത്തേക്ക് പോകുന്ന പന്തില്‍ അനാവശ്യ ഷോട്ടിന് ശ്രമിച്ചതാണ് താരത്തിന് വിനയായത്. 2019ന് ശേഷം ടെസ്റ്റില്‍ ഒരു സെഞ്ചുറി പോലും നേടാനാവാത്ത ഇന്ത്യന്‍ ക്യാപ്റ്റന്‍ അവസാനത്തെ 10 ഇന്നിങ്‌സുകള്‍ക്കിടെ ഇത് ആറാം തവണയാണ് 20നും 50നുമിടയിലുള്ള റണ്‍സിനിടെ പുറത്താവുന്നത്.
പലപ്പോഴും മികച്ച രീതിയില്‍ ബാറ്റ് ചെയ്യുന്നതിടെ നിസാര പിഴവുകളിലൂടെയാണ് താരം വിക്കറ്റ് നഷ്ടപ്പെടുത്തുന്നത്. കോലിക്ക് സംഭവിക്കുന്ന പിഴവ് ചൂണ്ടിക്കാട്ടി രംഗത്തെത്തിയിരിക്കുകയാണ് ഇന്ത്യയുടെ മുന്‍ ബാറ്റിങ് കോച്ച് സഞ്ജയ് ബാംഗര്‍.